David Castillo i Buïls

David Castillo i Buïls, is een Cataloansjchen schryver, zoernaliest en letterkundig kritieker.. J'is ip den 19sten van juni van 't joar 1961 in Barcelona geboorn.

Leevn

J'is afkomstig van de wyk Poblenou (in 't Vlams: Nieuwdorp), in 't begun van de joaren tsjestig was dadde een wyk vul mê fabriekn die de lucht styf vervuulden. Ze keekn in dien tyd nog nie veel achter de polluusje. As kleen joentje haatje last van asma en den huusdokteur zei under dasse mosten verhuuzn. Je was amper twi joar ô heel de familie no Vallcarca, nen anderen wyk van Barcelona, verhuusd is. In dien tied was Vallcarca nog biekans een boeregat vul barrakn vô 't werkvolk, mo me winnig huuz'n en zoender otows of fabriekn, met uutzoenderienge van e drukkerie. De lucht was do beeter, mo da wos ton ook ol dajje koste zeggn. Otje em bitje oekder waas, hiengt je dô den straffen gast uut en mê zyn moatn vocht je geirn teegn de bende van d'andere stroate, datje geirn vocht! Volgens z'n eign en was't ol nie so erg of datter uut zaag, een bitje steens smytn en an makander trekkn en sleurn, mo z'n oekders voenden da mo gevoarlik. Vor 'em te besjchermen bezorgd'n z'hem een postjie van loopjoengn bie 'n bank. Otje van 't sjchole kwaam en n'haad tie azô ton nie vil tyd nie mê vô met z'n slichte vrienden achter stroate te loopn, datje nie vîl tyd meer en haad. Otje ton z'n diplom van de middelboare sjchoole gekreegn êd, êtje ton nog een promoosje gekreegn in den bank wo datj'ôl van z'n veertienste werkte, dat j'een promoosje gekreegn êd. Mo zalve en voend tie da heelegangs nie geestig, j'n'hêd em do nie anders gedoan of vervild. Elf joarn bie den bank is volgens êm gelyk met een eeuwe verveelienge. Desoendanks ên die elf joar êm loater oenrechstreeks vil ipgebrocht, wan 't is dô datje d'inspiroasje gevoendn hêd vô de meeste van z'n romangs, womee dattie uutendelik vil succes ghêd êed.

As joenge gast was tie oowk styf bezig met de tegenculteure die ton ipkwam, achter dâ den tyrang Francisco Franco in 't joar vuuventsjeeventig de pupe an Moarten gegeevn had. Da was 't ende van feertig zwoare joarn wo dat al da geestig was verboon was van de regeerienge en van de katolieke kerke en de pasters die 't ol controlirden mo zalve nie assan deên wa dasse prikten. In dien nieuwen tyd wierd alles heel anders en ineens mocht olles of toch biekans, da vroeger nie en mocht. Dien tyd van de joarn tsjeeventig wo dat 't ol veranderde, spilt ip den achtergroend van de meeste van de boekn van David Castillo.

In 1989 is tie directeur gewordn van de letterkundige en culturille bylage van de hazette Avui, siddert 2011 van name veranderd in El Punt Avui. J'hêd ook nog een tydsjchrift uutgegeevn, Lletra de canvi. In 't joar 1997 êtje d'eeste Powwezieweke van Barcelona begost, en j'is nog assan directeur van d'organisoasje die da von ton af olle joarn organiezirt.

Een poar van z'n boekn zyn in 't Spoansjch en 't Italioansch vertold, mo niex in 't Ollands of in 't Brugsch.

Werkn

In 't joar 2015 aatje ol meer dan vichtien boekn gesjchreev'n. Omdat er niemendalle van êm in 't Brugsch of ander Westvlams en vertold is, kujje beeter kykn ip de wikipedia in 't sjchoon Vlams of in 't Cataloansjch ojje de lyste mê z'n boekn wilt zieën.

Pryzn

• Premi Carles Riba vô Game over
• Premi Crexells, 1999 vor El cel de l'infern
• Premi Sant Zordi, 2001 vô No miris enrere
• Premi Atlàntida, 2005 gelik zournaliest van 't joar
• De Powwezieprys Premi Cadaqués vô Esquena nua
• Premio Tratti (2006) vô d'Italiaoansjche vertollienge van z'n gedichtn Il presente abbandonato
• Premi Atlàntida vô de hazettebylage Cultura angezien gelik de beste literateur- en culteurbydrage in de hazette El Punt Avui