De Lustige Velodroom
De Lustige Velodroom of de Velodrome in Blanknberge, is êen van de gekendste touristische attracties, die ieder seizoen duzendn bezoekers antrekt, moa nog vele mêer duzendn kykers. ’t Is ’n outn veloboane die ip den dyk stoat nie verre van de Piere. Je kunt er roundjes ryen ip kluchtige velo’s. ’t Bestoat al sedert 1933.
’t Is open vanof de poasvakantie tout en met ‘t derde weekend van september. De piste wordt in september hêlegans ofgebrookn en in moarte were ipgebouwd.
Eeste generoatie
[bewerkn | brontekst bewerken]In 1933 wilde Alfons Monbaliu velo’s vereuren ip de zêedyk. Da mocht nie en Alfons kwam ip ‘t lumineus gedacht van e velodrome te bouwen ip ‘t strange, an den ôostkant van de piere. Gin kluchtige velo’s moar ‘n 30-tal geweune kindervelo’s. Alfons makte wel een oude velo met grôte wielen, die ip de piste stound vo versierienge. Omdat de bezoekers alsan moa vroegen van met die velo te meugn ryen, bouwde Alfons ’n poar “kluchtige velo’s” en azo is de Velodrome geboren. Achter den oorloge veruusde de piste noa de plekke van nu, an de westkant van de piere.
Twidde generoatie
[bewerkn | brontekst bewerken]In 1957 pakte Louis Monbaliu de piste van zyn voader over. Louis was ip da moment een bekende velo-acroboat. Binst den oorloge trad ‘n al ip en ook d’r achter toogdet ie overal z’n kunstn met de velo. Je balanceerdege azo ip den top van de piere met een êenwieler binst dat er vele toeschouwers stoundn te kykn. In dien tyd brakt ’n ook ‘t weireldrecord afstand me z’n êenwieler.
Louis breidege ook de veloverzoamelienge uut met de ovoale wielen, de rik-an-rik-tandem, de wipzoate, de swingbike, Maradonna, de achteruuttrapper en de specialiteit van ‘t uus de plôoivelo.
In de joaren ‘70 en ‘80 gerakte de velodrome gekend deur under doagelikse veloshows. De twi zeuns en dochter van Louis voerdn ‘n doageliks showspel ip, met de grotste velo (wieldeursnee 1,4m.) en ‘t allerklêenste velootje (wieldiameter 5 cm.).
Derde generoatie
[bewerkn | brontekst bewerken]Thierry, die al me voader Louis meewerkte ost ’n klêne was, pakte in 1990 tegoare me z’n vrouwe Nancy Hinderyckx (dochter van oud Club Brugge speler ’Bibi’) de velodrome over. En volgens de familietraditie et ’n de collectie kluchtige velo’s nog uutgebreid met ounder andere de lambadavelo.
Vierde generoatie?
[bewerkn | brontekst bewerken]Thierry en Nancy en e zeune en e dochter. Of dan zynder de traditie goan vôortzettn, goat den tyd uutwyzn.
Ip verplatsienge
[bewerkn | brontekst bewerken]- Ieder joar stoan ze met een klêne geïmproviseerde ’Lustige Velodroom’ ip de kerstmarkt van Brussel.
- In december 2006 stoundn ze vo den êeste ki met de volledige piste ip verplatsienge met de “Velofollies” Kortryk XPO, ’n velo-evenement in de Kortrykse hallen.