Fabian Cancellara

Van Wikipedia
Fabian Cancellara in de Rounde van Zwitserland van 2007

Fabian Cancellara (18 moarte 1981, Wohlen bei Bern, Zwitserland) is e Duutstoaligen, Zwitserschn coureur die surtout specialist is in 't tydryen, e discipline woarin dat 'n ol 2 kirs weireldkampioen en êne ki Olympisch Kampioen ewist is.

Carrière[bewerkn | brontekst bewerken]

Jeugd[bewerkn | brontekst bewerken]

Cancellara beguste te koersn at 'n 13 joar oud wos, doavôorn wos 'n foetbollist. 't Viel ol zêre up dat 'n e indeliks goein tydryder wos en at 'n junior wos, domineerdig 'n d'aar coureurs, oek internationoal, want ne won 't weireldkampioenschap zowel in '98 of '99. 't Joar derup, in 2000, wos 'n 'n twiddn in 't weireldkampioenschap voun beloftn, teegn e masse gastn die 3-4 joar ouder woarn. Up 't ende van 't joar wos 'n stagiair by Mapei en 't joar derup kwaam 'n doar oek prof.

Mapei (2001-2002)[bewerkn | brontekst bewerken]

Cancellara won in die twi joar 11 kirs, mor echt grôte overwinniengn zaatn der nog nie by. In 't twidde joar zaatn byn de jeugdploeg van Mapei, tope met oundermêer Pozzato, Rogers en Eisel. 'n Ploegleider van Mapei, Squinzi, noemde nem toune ol 'n toekomstigen Indurain.

Fassa Bortolo (2003-2005)[bewerkn | brontekst bewerken]

Mapei schidde uut me sponsorn en Cancellara gienk no Fassa Bortolo. In 't êeste joar wos 'n nog surtout goed voun 't tringsje van Petacchi te trekkn en won 'n oundermêer 'n tydrit in de rounde van België.

't Wos in 't noaste joar dat 'n echt deurebrak, e joar woarin dat 'n 'n proloog in de Rounde van Vrankryk won en 'n vierdn wos in Parys-Roubaix. 't Joar derup wos 'n êen van de favorietn in Parys-Roubaix, mo ne verlôor e masse tyd deur e plattn band, woadeure dat 'n mo 'n achtsn wos. E won oek e rit in Parys-Nice.

CSC (2006-2008)[bewerkn | brontekst bewerken]

2006 wos 't joar woarin da Cancellara vou 'n êeste kêe e klassieker won. In Parys-Roubaix wos 'n nie te kloppn en wos 'n achter Heinrich Suter in 1923 nog mo 'n twiddn Zwitser die dat ekunn had. E won oek 't weireldkampioenschap tydryen in Salzburg.

In 2007 won 'n vou 'n twidde ki 'n proloog van 'n Tour en oek 'n derdn rit, toune at 'n wegsproung uut 't peletong en ze nem nie kustn stekkn. 't Weireldkampioenschap tydryen wos oek were voun nem.

In 't begun 2008 won Tirreno-Adriatico en sproung 'n weg uut e kopgroep in Milaan-San Remo en kustn 't houdn toet an de mete. In Parys-Roubaix wos 'n twiddn in e sprint up de piste achter Tom Boonen. Up d'Olympische Speeln wos 'n 'n derdn in de wegrit en won 'n 'n tydrit. En hadde wel gin goeste mi voun 't weireldkampioenschap te ryen.

Team Saxo Bank (2009-)[bewerkn | brontekst bewerken]

't Begun van 2009 wos moeilik voun Cancellara, 't beeld van de Rounde van Vloandern wos van nem, toune at 'n up de Koppnberg me zyn keetn round ze nekke te voete no boovn kwaam. 't Wos mor in de Rounde van zyn land dat 'n were up niveau rochte. E won 'n proloog, 'n tydrit en 't klassement. Juuste doarachter is 'n oek Zwitsers kampioen up de weug erocht. In de Rounde van Vrankryk won 'n were 'n proloog en hield 'n achter 'n ploegntydrit 0,22 secondn vôorn up Lance Armstrong voun 'n gilvn boai.

In 2010 had Cancellara zyn beste vôorjoar ôois, e won 'n E3-prys, de Rounde van Vloandern en Parys-Roubaix. In 'n Tour won 'n 'n proloog en 'n latste tydrit, twi keirs vôorn 'n Duutscher Tony Martin.

Belangrykste overwinniengn[bewerkn | brontekst bewerken]

Persôonlik leevn[bewerkn | brontekst bewerken]

Cancellara is de zeune van e Duutstoaligen Zwitser en en Italioansje moeder.

Me zyn vrouwe Stefanie het 'n êen dochter, Giuliana.

Externe koppelienge[bewerkn | brontekst bewerken]