Godfried I van Leuven

Van Wikipedia
Naar navigatie springen Naar zoeken springen
Dat artikel es geschreevn in 't Kustwestvlams.

Godfried I van Leuven
ca. 1060-1139
Godfrid1.jpg
Landgroaf van Broabant - Groaf van Leuven
Periode1095-1139
VôorgangerHendrik III van Leuven
IpvolgerGodfried II van Leuven
Hertog van Neder-Lotharingen
Periode1106-1128
VôorgangerHendrik I van Limburg
IpvolgerWalram van Limburg
VoaderHendrik II van Leuven
MoederAdela

Godfried I van Leuven (met den Board) (ca. 1060 - 25 januoari 1139) was de groendlegger van 't loatere hertogdom Broabant. Je was de zeune van groaf Hendrik II van Leuven en Adela van Orthen (of Betuwe), e dochter van Everard van Orthen.

Achter den dôod van zyn broere Hendrik III van Leuven in februoari/moarte 1095, volgde Godfried hem ip ols groaf van Leuven en landgroaf van Broabant.

Kort doarip kwamt 'n in conflict met Otbert, prins-bisschop van Luuk, over 't groafschap Bruningerode. In 1099 kende keizer Hendrik IV 't groafschap toe an den bisschop die 't toevertrouwde an Albert III, groaf van Noamn. Godfried beslechtte ook e geschil tusschn Hendrik III van Luxemburg en Arnold I, groaf van Loon, over de benoemienge van den abt van Sint-Truudn. In 1102 hield 'n een inval teegn van Robrecht II van Vloandern by Koameryk.

Keizer Hendrik IV stierf in 1106. Zyn zeune en ipvolger Hendrik V, die revolteerde teegn zyn voader, besliste van hem te wreekn teegn d' anhangers van zyn voader. Je sloot Hendrik I van Limburg ip in 't gevang en je pakte zyn hertogdom van Neder-Lotharingen of vo 't an Godfried te geevn. Hendrik oentsnapte uut 't gevang en je probeerde zyn hertogdom were te krygn en Aken te verovern, moa da mislukte uutendelyk.

Godfried was van 1114 toet 1119 zelve teegnstander van de keizer, moa je makte 't doarachter were goed met hem. Je belegerde in 1122, tegoare mè keizer Hendrik V, den ipstandign Gosewyn I van Valkenburg en je verwoestte zyn kastêel. In 1123 wierd zyn broere Alberon I van Leuven benoemd toet bisschop van Luuk. In 1128 betoalde Godfried de prys vo zyn steun in 1125 an de verkêerde keunienkskandidoat, Frederik II van Swaabn, en je verloor zyn titel van hertog van Neder-Lotharingen. Je wierd vervangn deur Walram II van Limburg. Godfried hield wel 't markgroafschap Antwerpn en den hertogstitel. Azo oentstoend 't hertogdom Broabant.

Godfried was getrouwd met Ida van Chiny, zyn êeste vrouwe. Under joengers woarn:

  • Godfried II van Leuven
  • Hendrik, monnik in Affligem
  • Adelheid van Leuven, getrouwd mè keunienk Hendrik I van Iengeland en mè Willem van Aubigny
  • Ida, getrouwd met Arnold I van Kleve
  • Clarissa

Godfried hertrouwde met Clementia van Bourgondië, weeuwe van Robrecht II van Vloandern. Zynder krêegn gein joengers.

Godfried brocht zyn latste joarn deure in d' abdie van Affligem, woar dat 'n ook stierf. Je wierd begroavn in de zybeuke van d' abdykerke.