Hudevetterspling
’t Hudevetterspling is e klêen ingeslootn pling in Brugge, woa da van round ’t joar 1300 d’hudevetters of lêerlôoiers werktegn. In dien tyd lag ’t pling juste buutn de stad en da was nôdig vo de stank.
O je van de Burg deur ’t Blind-Ezelstratje lopt, kom je langs de Blinde-Ezelsbrugge over de reie. Rechtedeure ligt de Vismarkt en reks ’t Hudevetterspling.
In ’t middn stoat er e piloare me van boovn twi lêeuwtjes met ’t woapnschild van d’hudevettersgilde. D’r tegenover stoat under ambachtshuus, die an de reie lag. Da woater an ze nôdig by ’t verwerkn van ’t leer.
Van lêerbewerkienge krêegn ze dust en d’hudevetters an under eign herberge De Koe, ip den hoek van ’t pling, neffest ’t ambachtshuus. De noame paste by ’t ambacht. Nu is ’t vervangn deur ’t hotel-restaurang Duc de Bourgogne. De noamstêen met e koe hangt nog boovn den ingank. D’r woarn ton veel gebouwn met e gevelstêen, want d’r bestoundn nog gin huusnummers. In de boogn boovn de veisters van ’t hotel is te zien hoe dan de lêerlôoiers werktegn.
Loater wierd ’t pling gebruukt vo klêne vismarkt.
D’r wierd goekope vis, mussels en geirnoars verkocht deur viswuuvn. De diere vis lik kabeljauw en zalm wierd ip de vismarkt verkocht.
In de twiddn elft van de 20e eeuwe wierd de klêne vismarkt ofgeschaft en kwoamn d’r kroamn me souvenirs, têkeniengn en schilderyen vo de toeriestn.
’t Pling komt an den andere kant uut ip ’t bekendste zicht van Brugge, de Rozenhoedkoaie, die z’n noame krêeg deurdan d’r doar in de middelêeuwn poaternosters verkocht wierdn.
Externe koppelienge
[bewerkn | brontekst bewerken]
|
Ofbeeldiengn die ier by passn ku je vien in de categorie Hudevetterspling van Wikimedia Commons. |