Inn

Van Wikipedia

De Inn in Kufstein (Tirol)

De Inn (Latyn: Aenus, Reto-Romoans: En) is e zyriviere van de Donau en êen van de belangrykste woaterofvoerweegn van d' Alpn. De riviere is 518 km lank en stroomt deur drie landn: Zwitserland, Ôostnryk en Duutsland.

De bronne ligt in de Zwitsersche Alpn, te westn van Sankt Moritz in 't kantong Graubünden. De riviere lopt deur 't dal Engadin, woar dan de beweuners nog gedêeltelik Reto-Romoanstoalig zyn.

Verder lopt de riviere nôordôostwoarts, passeert de grenze met Ôostnryk en komt vanof Landeck deur de dêelstoat Tirol met hoofdstad Innsbruck (brugge over de Inn). Ze stèekt ton de grenze over noa Beyern by Kufstein.

By de stad Rosenheim verlat de riviere d' Alpn. Tusschn Haiming (Duutsland) en Braunau (Ôostenryk) komt de Inn t'hope met de Salzach, heur grotste zyriviere. Vanof hier toet an de Donau vormt de Inn de grenze tusschn Duutsland (Beyern) en Ôostnryk (Ipper-Ôostnryk).

Ip 't traject liggn verschillige woaterkrachtcentroales. By de stad Passau moendt de Inn uut in de Donau.

Wikimedia Commons