Joachim Patinier

Joachim Patinier, ook Patinir of Patenier (Bouvignes-sur-Meuse (Dinant), ca. 1480-1485 - Antwerpn, 5 oktober 1524) was e Zuud-Nederlandsche kunstschilder, den êestn echte landschapsschilder in de Lêge Landn. Je makte van 't landschap 't ounderwerp en de personages woarn eigntlyk bykomstig en somtyds geschilderd deur andere kunstnoars, wat da geweune was in dien tyd.

Leevn en werk

Over zyn leevn is 't er nie vele bekend. Patinier was bevriend met de schilder Quinten Metsys en ze werktn vele tegoare. In zyn vroeg werk is 't hy beïnvloed gewist deur Hieronymus Bosch. Vanof 1515 was 't hy lid van de Sint-Lucasgilde in Antwerpn. Albrecht Dürer schilderde zyn portreit binst zyn bezoek an Antwerpn.

Der zyn moa vuuf doekn me 't handtêekn van de kunstnoare: "Opus Joachim D. Patinier". De D. van Dionantensis getuugt van zyn ofkomste uut Dinant. Der wordn teegnwoordig e stik of twientig werkn toegeschreevn an Patinier.

Ênigte werkn:

De Vlucht noar Egypte, Antwerpn, Keunienklyk Museum vo Schône Kunstn
't Doopsel van Christus, Weenn, Kunsthistorisches Museum
De verzoekienge van Sint Antonius, Madrid, Museo Nacional del Prado
Den oversteek noa den ounderweireld of Oversteek van de riviere Styx, Madrid, Museo Nacional del Prado
Landschap met de heilign Hieronymus, Madrid, Museo Nacional del Prado
Berglandschap met de heilign Hieronymus, Karlsruhe, Staatliche Kunsthalle
Landschap met den heilign Hieronymus, Parys, Musée du Louvre
Landschap met de Verwoestienge van Sodom en Gomorra, Rotterdam, Boijmans van Beuningen
Rust ip de vlucht noar Egypte, Berlyn, Gemäldegalerie