Juan II van Oostnryk

Van Wikipedia
Juan II van Oostnryk
16291679
Don Juan II van Oostnryk, 1678
Landvoogd van de Zudelikke Nederlandn
Periode1656 – 1659
VôorgangerLeopold Willem van Oostnryk
IpvolgerLuis de Benavides Carillo
VoaderFilips IV van Spanje
MoederMaria Inés de Calderón

Don Juan José van Oostnryk (Madrid, 7 april 1629 - Madrid, 17 september 1679) was e Spaanschn generoal en stoatsman. Je was van 1656 tout 1659 landvoogd van de Zudelikke Nederlandn en tusschn 1677 en 1679 wast ’n êeste minister van Spanje.

Zyn leevn[bewerkn | brontekst bewerken]

Don Juan was erkend ols buutnechtelikke zeune van Filips IV van Spanje en je wierd doadeure ipgebrocht lik e prins. Zyn moeder was de tonêelspeelster Maria Inés de Calderón.

In 1647 wierd ’n no Napels gezoundn mè militaire versterkienge vo de vicekeunink Rodriguez Ponce de Léon te steunn teegn den ipstand, angevoerd deur Masaniello. En loater ols vicekeunink no Sicilië vor ’n ende te moakn an de pacificoatie van Catalonië, da sedert 1640 in ipstand was. Je was doa vrêe populair, nie ollene omdat ’n voorstander was van vrede mo je kwam ook sympathiek over en j’aa z’n uterlik mee, in teegnstellienge mè de meeste andere Habsburgers.

In 1656 wierd ‘n landvoogd van de Zudelikke Nederlandn, die ip da moment ipstandig woarn teegn under soeverein Filips IV van Spanje.

Don Juan toogdeg' em vrêe courageus in d’oorloogn teegn Vrankryk en Iengeland.

Je was styf ambitieus en je makte de foute dat ’n em mè z’n tweeëntwintig joar joungere olfzuster Margaretha Theresia van Spanje wildege verloovn. Keunink Filips IV was nie akkoord, want j’aa z’n dochter beloofd aan eur nounkel, keizer Leopold I van ’t Illig Rôoms Ryk vor azo eur positie in d’erfipvolgienge t’oudn en de rechtn ip de troon via eur jounges vôort te loatn goan. In 1665 pakte Filips Don Juan z’n recht ip erfipvolgienge of.

Van 1677 tou an z’n dood wast ’n êeste minister ounder z’n olfbroere Karel II van Spanje, die zwakzinnig was. Don Juan ielp em vele, je gaf em lesse en probeerdeg’ em te leern leezn en schryvn.

In 1678 zound ’n Karels moeder Maria Anna van Oostnryk weg uut Madrid. Den zeevntienstn september 1679 ist ’n gestorvn en kost ze werekeern.

Wikimedia Commons