Louis VIII van Vrankryk

Lienks: 't Beleg van Avignon in 1226 Middn: Dôod van Louis VIII
Reks: Krônienge van Louis IX

Louis VIII, bygenoamd de Lêeuw (Frãns: Louis VIII le Lion), van 't Huus Capet, (Parys, 5 september 1187 – Montpensier, 8 november 1226, was keunienk van Vrankryk van 1223 tout 1226.

Je was de zeune van de Frãnsche keunienk Philippe Auguste en Isabelle van Henegouwn. J'erfde 't groafschap Artesië van zyn moeder. Je volgde zyn voader ip ip 14 juli 1223 en je wierd da zelfste joar gekrôond in Reims ip 6 ogustus.

In 1204 ha Philippe II Auguste Anjou kunn veroovern van d' Iengelsche Plantagenets.

Louis VIII had et groafschap Anjou en Maine an zyn zeune Jean Tristan willn geevn ost ie oud genoeg was, mo Jean Tristan stierf in 1232. Doarom krêeg zyn joungste postuum geboorn zeune Charles I van Anjou de groafschappn in 1246 van zyn broere Louis IX van Vrankryk en je kwam de stamvoader van 't Huus Capet-Anjou.

Vrouwe en jounges

Louis trouwde ip 23 meie 1200 an zyn 12 joar mè Blanche van Castilië. Z'haan 13 jounges

1. Blanche (1205-1206)
2. Philippe (1209 - 1218)
3. Alphonse en
4. Jean (1213-1213), twiliengn
5. Louis IX (1214-1270)
6. Robert I van Artois (1216-1250)
7. Philippe (1218-1220)
8. Jean Tristan (1219 - 1232)
9. Alphonse van Poitiers (1220-1271)
10. Philippe Dagobert (1222 - 1232)
11. Isabelle (1225-1270)
12. Étienne (1225-1226/1227)
13. Charles I van Anjou (1227-1285) (postuum geboorn)

Zyn oorloogn

Louis VIII krêeg zyn bynoame "de Lêeuw" nog vo dat ie keunienk was, binst den Êeste Barongoorloge (1215–17) teegn den Iengelsche keunienk Jan zounder Land. Achter zyn overwinnienge van de Slag van Roche-au-Moine in 1214, vielt ie Zuud-Iengeland binn en de rebelleernde barongs in Londn riepn hem ip 2 juni 1216 uut tout keunienk van Iengeland. Louis eiste vor e joar den titel ip, mo da wierd betwist en j'is nôoit gekrôond gewist.

In 1226 begost ie de twidde Albigenzische Kruustocht teegn de Kathaarn. Je wilde de Languedoc annexeern en je kost Avignon en ook Beaucaire veroovern, mo da lukte nie mè Toulouse. Binst dat ie were kêerde noa Parys krêegt ie de ziekte dysenterie.

Zyn dôod

Je stierf ip 8 november 1226 in de Château de Montpensier in Auvergne. Zyn graf stoat in de basilieke Saint-Denis.

Zyn zeune Louis IX volgdeg hem ip als keunienk van Vrankryk.

Ofbeeldiengn die ier by passn ku je vien in de categorie Louis VIII of France van Wikimedia Commons.