Lodewyk den Hakkeloare

Lodewyk II van West-Francië, bygenoamd den Hakkeloare, van 't Huus van de Karoliengers (1 november 846 - Compiègne, 10 april 879), was den oudste zeune van Karel de Kletsn en Ermentrude van Orléans.

Je volgde zyn joungere broere ip in Aquitanië in 866. Achter den dôod van zyn voader in 877 kwamt ie keunienk van West-Francië. Je wierd den 8stn december 877 gekrôond deur aartsbisschop Hincmar van Reims en de 7stn september 878 deur paus Johannes VIII.

Den êestn november 878, e joar achter den dôod van zyn voader, ist ie in Voern tegoare gekommn mè Lodewyk de Joungn, zeune van Lodewyk den Duuts. Ze bevestigdn doa d’akkôordn van ‘t Verdrag van Meerssen. Z’han ofgesprookn van tegoare an één kant te stoan teegn de Vikings en makoars jounges te beschermn.

Lodewyk den Hakkeloare overleefde zyn voader mo twi joar en j’is nôois gin keizer gewist. De volgnde keizer, Karel den Dikkn, is mor in 881 gekrôond.

Vrouwn en jounges

Mè zyn êeste vrouwe Ansgarde van Bourgondië had ie twi zeuns en twi dochters.

• Lodewyk III
• Karloman
• Hildegarde
• Gisela

Mè zyn twidde vrouwe Adelaide van Parys had ie e dochter en e zeune. Zyn derde zeune Karel is mo geboorn achter zyn dôod.

• Ermentrude
• Karel de Simpeln

Zyn zeuns zyn olle drie keunienk van West-Francië gewist.

Achter zyn dôod volgdn zyn twi oudste zeuns hem ip. Ze woarn nog mo 15 en 13 joar oud.

Provence wilde ze nie ols ipvolger en ze koozn Boso van Provence, die gin Karolienger was. Je stichtte ‘t keunienkryk Lêger-Bourgondië (of Cisjuranië) en je liet hem uutroepn tout keunienk.

West-Francië van Lodewyk den Hakkeloare in 't rood (877)

Zyn ipvolgers in 880: Lodewyk III (purper), Karloman (blow), Boso van Provence (geel)

Ofbeeldiengn die ier by passn ku je vien in de categorie Lodewyk II van Wikimedia Commons.