Myrte

Geweune myrte
Taxonomische indêlienge
Ryk: Plantae (Plantn) Stamme: Embryophyta (Landplantn) Klasse: Spermatopsida (Zoadplantn) Clade: Angiospermae (Blommeplantn) Clade: Eudicotyln (Echte twèezoadlobbign) Clade: Rosids Orde: Myrtales Familie: Myrtaceae (Myrteachtigen) Geslacht: Myrtus (Myrte)
Sôorte
Myrtus communis L., 1753

De geweune myrte (Myrtus communis) is e plante uut de familie van de myrteachtigen (Myrtaceae). De plante groeit in 't wild ip droge, zunnige plekkn an de Middellandsche Zêe en in hêel 't gebied van Middn-Azië tout an Nôord-Afrika.

Kenmerkn

Myrte is e struke mè leerachtige bladjes, die in de nateure vuuf meter hoge kan kommn en die assan groen bluuft. Teegn 't ende van de lente kommn der witte blommetjes an die goed riekn en die rypn tout dounkere purperkleurige beiers.

Geschiedenisse

By d' oude Griekn en Romeinn was myrte symbool vo schôonheid, liefde en vruchtboarheid. By fêestn wierdn myrtetakkn in brande gestookn en de vrouwn droegn e myrtekranse ip hunder trouw. Myrte was de plante van de liefde en verboundn met de godinne Aphrodite en Venus.

In de loop van de geschiedenisse makte myrte overal in Europa dêel uut van trouwbouquets en de taksjes wierdn achter den trouw geplant vo geluk en vruchtboarheid te briengn.

Geneeskunde

Myrte helpt by stôornissn an de derms en d' urineweegn en by ountstekiengn in de mound. 't Briengt e verzwakt immuunsysteim were in evenwicht. De kapotgewreevn bloarn zoun helpn by acne en psoriasis.

Gebruuk

Myrteolie uut de bloarn wordt in parfums verwerkt. Van 't hout wordt houtskole gebrand.

Myrtetaksjes kunn'n by vlêesgerechtn ip de zelfste maniere gebruukt wordn lik rozemareyn en tym en de bladjes lik laurier. De beiers kunn'n meegekokt wordn.

Gedroogde bloarn en blommn kunn'n in zaksjes ipg'hangn wordn vor in huus een angenoame reuke te verspreidn.

Ofbeeldiengn die ier by passn ku je vien in de categorie Myrtus communis van Wikimedia Commons.