Petrus Christus

"St. Eligius in z’n goudsmedatelier" deur Petrus Christus, 1449, Metropolitan Museum of Art, New York

Petrus Christus (ca. 1410 – Brugge 1472 of 1473) was 'n Vlamsche kunstschilder van de twiddn elft van de 15e eeuwe. Je makte deel uut van de schole van de Vlamsche Primitievn.

D’r is eigentlik nie vele over em geweetn. Je kwam verzekers uut ’t dorp Baarle by Breda. In 1444 kocht 'n ’t poorterschap van Brugge, ’n bloeiend, commercieel en politiek centrum woa dat 'n as kunstenoare interessante updrachtn koste krygn en heel veel succes ad.

Z’n werk was styf beïnvloed deur de in 1441 gestorvn Jan Van Eyck. Dat is te zien an de ingetoogn sfeer, de nauwkeurige ofwerkinge en de zin vo detail in z’n werkn.

In 't Groeningemuseum in Brugge angt 't werk: Isabella van Portugal mè d'illige Elisabeth ca. 1457-1460. 't Paneel is 't linkerluuk van 'n triptiek woavan 't verloorn gegoane centroal paneel 'n Onze lieve Vrouwe van Smartn voorstelde. De updrachtgeefster Isabella van Portugal was de vrouwe van de Bourgondischn ertog Filips den Goein. De beschermillige Elisabeth van Ongarye, up 't werk als kloosterzuster ofgebeeld, oudt drie upeengestoapelde kroonn vaste, symbooln vor eur godsvrucht, kuuseid en keuninklikke geboorte. Die eignschappn woarn ook up ertoginne Isabella van Portugal toepasselik. Ze gink in 'n franciscanessnklooster en besteldige vo dien geleegneid d'n triptiek.

Sommigte kunstistorici peizn dat 't schilderye nie eignandig deur Petrus Christus gemakt is, moa wel deur 'n assistent, verzekers een van zyn zeuns.

Mêer ofbeeldiengn die ier by passn ku je vien ip Petrus Christus ip Wikimedia Commons.