Peyo

Van Wikipedia
Ga naar: Begunplekkn, zoeken
Dat artikel es oorsprounkelik geschreevn in 't Kustwestvlams.

Peyo signature.svg
Peyo in 1990

Peyo, pseudoniem van Pierre Culliford (Schaarbeek, 25 juni 1928 - Brussel, 24 december 1992) was e Belgische striptêkenoare, bekend van zyn series Benoît Brisefer (Steven Sterk), Jacky et Célestin (Jakke en Silvester), Johan et Pirlouit (Johan en Pirrewiet) en surtout Les Schtroumpfs (De Smurfen).

In 1945 kwamt 'n terechte by de têeknfilmstudio CBA ols assistant vo têekniengn te retoucheern mè gouacheverve. Je wierd doa de joengste collega van André Franquin en Morris. Achter dat de firma in 1946 failliet gienk, blêeft 'n in contact met d' andere, die giengn werkn by 't stripblad Spirou (Robbedoes) die juste heripgericht was. Culliford probeerde der ook binn te geroakn, moa je wierd nie anveird. Vo zyn tekniek by te stelln, begost 'n an e kunstipleidienge an d' Academie in Brussel. Je stapte doarachter in de reclamesector. In dien tyd begost 'n zyn strips t' oendertêeknn met de noame "Peyo", lik da zyn neeftje zyn (by)noame (Pierrot) uutsprak. Je werkte ook vo de gazettn La Dernière Heure en Le Soir.

In 1951 kwam Peyo André Franquin teegn vo den êeste kêer in vuuf joar. Franquin oenderhandelde mè Charles Dupuis vo Peyo t' anveirdn en da was mè succes. In 1952 kost Peyo by Dupuis begunn. Je begost met e nieuw verhoal roend Johan, Le Châtiment de Basenhau (De nederloage van Basenau) die vanof 11 september 1952 uutkwam in 't blad Spirou. In 1954 dêed er e nieuwe figeure mee in de reekse roend Johan met de noame Pirlouit (Pirrewiet), êest moa vor êen album. Mor omdat 'n zo populair was, mocht 'n bluuvn en de reekse wierd hernoemd toet Johan et Pirlouit (Johan en Pirrewiet).

In de zomer van 1957 was Peyo mè Franquin an de Nôordzêe. Peyo vroeg an Franquin vo 't zout deure te geevn, moa je kost nie ip 't woord kommn en je zei: "Passe-moi le schtroumpf. (Gêef e kêe de smurf deure)". Franquin antwoordde ook mè: "Schtroumpf." En azo is de smurftoale geboorn. De toale wierd uutendelik gebruukt in 1958 vo 't verhoal De fluute mè zes smurfn, woarin dat e dwergvolksje, de Smurfn, een hoofdrolle speeln. De blowwe kleur van de Smurfn was e gedacht van Nine, de vrouwe van Peyo. Ip 23 oktober 1958 kwoamn de Smurfn vo den êeste kêe in 't blad Robbedoes en in 1959 begost de merchandising roend De Smurfn. De verhoaln sloegn an en de Smurfn wierdn vanof 1963 een echte stripreekse.

In 1975 kwam de film De fluute mè zes smurfn in de cinemazoaln. De merchandising bereikte zelfs den Amerikoansche tv-zender NBC. In 1981 besteldn ze by den Amerikoansche têeknfilmstudio Hanna-Barbera e têeknfilmreekse. Da wierd een internationaal succes.

In Peyo's studio kwoamn ook zyn twêe joengers hem helpn: dochter Véronique wierd belast met de merchandising, zeune Thierry kwam supervisor van de têeknstudio. Lik da Peyo 't wilde, wordn zyn reeksn achter zyn dôod vôortgezet.

Wikimedia Commons