Philippe Vlerick

Dit artikel es geschreevn in 't Kortryks, en da zou best ozô bluuvn.

---

Philippe Vlerick (Kortryk, 8 juni 1955) es ne West-Vlamschn commercant. In 2006 es't ie tot Manager van 't joar gekoozn, nen prys uitgereikt deur Trends.

Ie es nie allêne licentioat in de rechtn en licentioat in management, moa j'eit wok ne diploem in de filosofie.

De vezels van den textiel lôpen deur hêel zyn familie, lyf en carrière.

Achtergrond

Philippe Vlerick komt uut een beroemd geslacht. Zô eit zyn nonkel, André Vlerick, de Vlerick ôgeskole voo management gesticht. Omda André gin joengs oat, eit ie Philippe onder zyn vleugels gepakt.

Zyn voader Lucien baron Vlerick èt et Kortrykse tapytnbedryf BIC Carpets in 1956 ipgericht, woarvan da Philippe Vlerick nu vôorzitter en gedillegeerd bestuurder van es. BIC makt en verkopt vré goe en vré skône tapyten en bykans idere konink of chanteur è zulk e tapyt liggn. Zyn moeder Thérèse Vandewiele es dochter van een andere grôte familie: de familie Vandewiele, gekend van de textielmassinebouwers. Zyn vrouwe, Patricia Bouckaert, es een skôonzuster va Mieke De Clerck, van de Beaulieu-familie.

Carrière

Philippe n'èt ni gemakelik g'had. Ie moeste ol van jonks of goan werken. In 1985 volgt ie zyn voader ep. Voo 't moment es't ie vôorzitter va UCO Raymond, moar ie es wok aktief in de metoalsector, in BMT, by Spector en Pentahold én in de financiele sector, mêerbepoald in de KBC woar dat ie bestuurder es. J'eit rond de vêertig bestuurdersmandoatn.

Van 2000 tot 2005 wos 't ie vôorzitter va Febeltex. Ie es gekend omdat ie een grôot netwerk va contactn eit en doarom vrêe invloedryk es. Zyn contactn zyn nie ollêne in den industriëlen weireld, moa wok in de financiën en et keuninklik of.