Pieter Pourbus

Van Wikipedia
Naar navigatie springen Naar zoeken springen
Petronella Heve en eur drie dochters (1565-1570), Onze-Lieve-Vrouwekerke (Brugge)
Remi Ommejaghere en zyn drie zeuns (1565-1570), Onze-Lieve-Vrouwekerke (Brugge)

Pieter Pourbus (Gouda, ca. 1523 - Brugge, 30 januoari 1584) was de belangrykste kunstschilder in Brugge in de twiddn elft van de 16e eeuwe.

Je was êen van de Vlamsche maniëristn en e veelzydige Renaissance- kunstenoare. Je was nie ollêne kunstschilder, mor ôok beeldouwer, architect, ountwerper van wandtapytn, cartogroaf, landmeter en ingenieur.

In 1540 vestigde Pieter Pourbus em in Brugge en in 1543, an z’n 20 joar, liet ’n em ols mêester in ’t Brugs schildersambacht inschryvn. Je trouwdeg' in Brugge met de dochter van z’n lêroare Lanceloot Blondeel.

In 1549 krêegt ’n ipdracht van ’t stadsbestier vo de fêestdecoroasje te moakn vo de komst van krôonprins Filips van Spanje (de loatern Filips II van Spanje) en z’n voader Keizer Karel V.

In 1552 kocht ‘n z’n huus, woa dat ‘n z’n atelier aad in de Jan Miraelstroate.

Ols portrettist wast ’n styf interessant deur zyn scherpe observoasje van menschn. Deur under houdienge, klêern, bepoalde attribuutn lik e woapnschild of bijous, kostn ze moatschappelik g’identificeerd wordn.

Karel Van Mander schrêef over em in z’n beroemd Schilderboeck: ‘Nooyt heb ick ghesien bequamer Schilder winckel als hy hadde’.

Zyn lêerliengn woarn: z’n zeune Frans Pourbus den Oudn, z’n klêenzeune Frans Pourbus de Joungn en Antoon Claeissens.

Pieter Pourbus is in 1584 in Brugge gestorvn en begroavn in de Sint-Gilliskerke.

Werkn[bewerkn | brontekst bewerken]

D’r angn werkn van Pieter Pourbus in ‘t Groeningemuseum, in d'Onze-Lieve-Vrouwekerke en de Sint-Jacobskerke in Brugge en in ’t museum in Gouda.

Trivia[bewerkn | brontekst bewerken]

’t Restaurang Pieter Pourbus, ip den hoek van de Grauwwerkersstroate en de Pieter Pourbusstroate in Brugge, was zyn ouderlik huus uut 1561. Pourbus zelve weunde en werkte in de Jan Miraelstroate. De Pieter Pourbusstroate noemde in d’n tyd Coeiestaartstraetken.

Amedée Visart de Bocarmé, de burgemeester van Brugge van 1876 tout 1924, weunde in de stroate. Je was van oadel en je weunde in e chic huus, ton 't hof van Puebla. Je vound Koeiesteirtstroate gin noame vo zyn adres en doarom liet 'n de noame verandern in Pieter Pourbusstroate.

In Gouda is d’r ook e stroate no Pieter Pourbus genoemd.

’t Koppel Van Eyewerve[bewerkn | brontekst bewerken]

Z’en ’t koppel Van Eyewerve kunn identificeern deur de woapnschildn. Ze zyn getrouwd in 1551 of 1552 en ’t schilderye is e trouwportret. Den hound neffest Jacquemyne is e symbool van trouw. Deur ‘t veister is de kroane van Brugge te zien. Verschillige details toogn dat ’t e koppel uut de Brugsche elite was.

Ze weundn in 't huus De Pelikaan in de Vlamingstroate nr. 23, ter hoogte van de kroanplatse woa da de kroane stound. Jan van Eyewerve was e ryke wynmarchang.

Portret van Jan van Eyewerve, Groeningemuseum
Portret van Jacquemyne Buuck, Groeningemuseum
Wikimedia Commons