Simon Stevinpling (Brugge)

Dat artikel es geschreevn in 't Noordelik West-Vlams.

---

't Simon Stevinpling.

't Simon Stevinpling is e pling geleegn in Brugge, tusschn de Stêenstroate en d' Oede Burg. Ip 't pling stoa 't stanbeeld van de wis- en nateurkundige Simon Stevin.

Geschiednisse

Westvlêesuus

't Simon Stevinpling mê 't Westvlêesuus.

Vanof 't begun van de vêertienste êewe stoend ip da pling 't Westvlêeshuus of Grôot Vlêesuus van Brugge. 't Was eigndom van 't ambacht van de vlêesbewerkrs en voa dat 't ipgericht wierd, êete de platse d' Oede Vrydagmart. Vlêes wierd toe tonne verandeld in d' 'alln an 't Belfort. 't Westvlêesuus was êest e twêebeukig gebow en vanof d' achtienste êewe krêeg 't e klassieke vôorgeevle. 't Was geleegn dichte by de platse woa da de verbiendiengsweegn uut Kortryke en Gent tegoarekwoamn.

In 1819 wierd 't deur de stad angekocht en ofgebrookn, woadeure da 't têegnwôordig pling oentstoend woarip datr boomn geplant wierdn.

Browery

Nog vôodat 'n echt pling wierd, wastr lanst den ôostkant de browery "De Zwoane" gevestigd, in 1441 nog bekend oendre de noame "In den Grôotn Zwoane", één van de 54 brouweryn in Brugge van dien tyd. De browery is bluuvn bestoan toe in 1937. In de gebown kwoamn achtrêen e garoazje en e bankkantôor. De geevlstêen mê de zwoane is nog te ziene in de vôorgeevl.

Ofbeeldiengn die ier by passn ku je vien in de categorie Simon Stevinplein (Brugge) van Wikimedia Commons.