Simon Stevinpling (Brugge)

Van Wikipedia
Naar navigatie springen Naar zoeken springen
Dat artikel es geschreevn in 't Noordelik West-Vlams.

't Simon Stevinpling.

't Simon Stevinpling is e pling geleegn in 't êrte van Brugge, tusschn de Stêenstroate en d' Oede Burg. Ip 't pling stoa 't stanbeeld van de wis- en nateurkundige Simon Stevin.

Geschiednisse[bewerkn | brontekst bewerken]

Westvlêesuus[bewerkn | brontekst bewerken]

't Simon Stevinpling mê 't Westvlêesuus.

Vanof 't begun van de vêertienste êewe stoend ip da pling 't Westvlêesuus of Grôot Vlêesuus van Brugge. 't Was eigndom van 't ambacht van de vlêesbewerkrs en voa dat 't ipgericht wierd, êete de platse d' Oede Vrydagmart. Vlêes wierd toe tonne verandeld in d' 'alln an 't Belfort. 't Westvlêesuus was êest e twêebeukig gebow en vanof d' achtienste êewe krêeg 't e klassieke vôorgeevle. 't Was geleegn dichte by de platse woa da de verbiendiengsweegn uut Kortryke en Gent tegoarekwoamn.

In 1819 wierd 't deur de stad angekocht en ofgebrookn, woadeure da 't têegnwôordig pling oentstoend woarip datr boomn geplant wierdn.

Browery[bewerkn | brontekst bewerken]

Nog vôodat 'n echt pling wierd, wastr lanst den ôostkant de browery "De Zwoane" gevestigd, in 1441 nog bekend oendre de noame In den Grooten Swaene, één van de 54 brouweryn in Brugge van dien tyd. De browery is bluuvn bestoan toe in 1937. In de gebown kwoamn achtrêen e garoazje en e bankkantôor. De geevlstêen mê de zwoane is nog te ziene in de vôorgeevl.

Nêffnst de brouwery "De Zwoane" wastr e viftiend-êewsche ofspannienge en êrberge mê de noame "In de Goedn Ôorn - Au Cornet d'Or", vergoadrplatse van veele verêenigiengn en platse van ofsproake ip marktdaagn. Teegn 't ende van de twientigst' êewe wierd 't 'n fast-food-zoake.

Kapelle[bewerkn | brontekst bewerken]

An de westkant van 't Simon Stevinpling stoendr van 1700 toe 1839 de Eilig-Sakramentskapelle. Iddre stoend ip die plekke d' êrberge "'t Peerdeken". Omdatr in 1700 'n eiligschennisse was gebeurd mê gekonsakreerde ostjes, wierdr beslist vo lik têekn van verzoenienge ip die platse e kapelle ip te richten. Die H. Sakramentskapelle wierd in 1799 verkocht en ofgebrookn. E niew andls-uus wierd gebowd woa da nog e poar elementn uut die kapelle in te ziene zyn. In da gebow was achtre de Twidde Weirldôorlooge e Prémaman-wienkle gevestigd en teegn 't ende van de twientigst êewe wierd 't e chokolaa-wienkle.

Stanbeeld[bewerkn | brontekst bewerken]

Vanof 1827 wierd de vrygekommn plekke 't Simon Stevinpling. 't Standbeeld van Stevin wierd mê groot beslag en fêestlikeedn oentuld ip 26 juli 1846. Dr was pertank e serjeuze teegnslag, omda 't bronzn stanbeeld woavan den ipdracht was gegeevn an beeldhowre Eugène Simonis nie grêed was. Vo 't fêeste te reddn wierdr tonne in zeevn oastn e ploastrn beeld gemakt deur de Brugsche beeldowrs Auguste Derre, Dominique Van Weydevelt, Henri Pickery en Jules Van Nieuwenhuyze. 't In brons gekleurde beeld wierd ip de dag van d' inuldigienge ip 't voetstik geplatst, e poempe uut 't vroegre Westvlêesuus. 't Bronzen beeld wierd mor in septembre 1847 geleevrd en geplatst.

Vanof de twidde êft van de twientiste êewe is 't pling oentwikkld nor oofdzoaklik rekreatieve funksjes : 't dient lik terras vo d' anpoalnde drankgeleegneedn, dr zyn 'n antal wienkls, roend niewjoar istr e kerstmart en roend meie wordt 't vor e dêel bezet deur de Meifôore.


E bittje voddr kykn[bewerkn | brontekst bewerken]

  • (fr) Duclos, Adolphe 1910 : Bruges, histoire et souvenirs, Brugge.
  • (nl) Rotseart, Koen 1973 : Brugse straten, Brugse namen Brugge, p. 13-15.
  • (nl) Schouteet, Albert 1977 : De straatnamen van Brugge. Oorsprong en betekenis, Brugge.
  • (nl) Mertens, Jacques 1990 : Simon Stevin, Brugge.
Wikimedia Commons