Veurne-Ambacht
Veurne-Ambacht is e gebied in de Westhoek, in 't noordwestn van West-Vloandern, da begrensd wordt deur de Noordzee in 't noordn, de Fransche grenze in 't westn, den Yzer, den Yperlee en de Kemmelbeke in 't oostn en Rênienge, Oostvletern, Westvletern, Proovn en Roesbrugge-Hoarienge in 't zuudn. Vroeger was Veurne-Ambacht e kasselrye.
Geschiedenisse
[bewerkn | brontekst bewerken]Vanof d'11ste eeuw wierd 't Groafschap Vloandern ingedeeld in kasselryen, die nog e kèer ingedeeld woarn in ambachtn.
Veurne-Ambacht makte eest deel uut van de kasselrye van Sint-Omaars (nu in Frankryk), moar is in de loate 11ste eeuw verheevn toet zelfstandige kasselrye, vor e betere controle te kunn hèn over de streke. De kasselrye Veurne omvatte nie allene Bachten de Kupe, nu 't gebied tusschn de Noordzee, den Yzer en de Fransche grenze, moa strekte zuudwoarts zelfs uut toet teegn Poperienge en Yper. 42 parochies hiengn der rechtstreeks van of. Ze wierdn verdeeld over twèe vierschoarn.
Landschap
[bewerkn | brontekst bewerken]In 't gebied zyn der drie verschillige landschappn:
- ’t Blote: plat en leeggeleegn polders van den Yzer die der gekommn zyn deur 't inpoldern van schorrelandn vanof de 12e eeuw. In Avekapelle en Zoutenoaie zyn der nog deeln van d'oude zeedykn te zien.
- De Moern: moerassig gebied da 3 toet 4 m oender de zeespiegel ligt en drogegeleid is.
- ’t Houtland: hoger geleegn, zandiger en meer begroeid
Veurne-Ambachtroute
[bewerkn | brontekst bewerken]De Veurne-Ambachtroute is e veloroute van 48 km, die lopt deur 't karakteristiek landschap van 't Blote en d'oude kasselrye van Veurne-Ambacht. Der is zowel landschap of architecteure te zien.
Vanuut Koksyde lopt de route noa Veurne, 't polderdorp Steenkerke, de Broekn van Oern, Alveringem en Zoutenoaie. In 't werekeern lopt de route deur de busschn en duunn van De Doornpanne en Den Hoogn Blekker, mè zyn 33 meter d'hoogste dunetop van de Vlamsche Kust.