Wim Delvoye
- Dit artikel es geschreevn in 't Werviks, en da zou best ozô bluuvn.
Wim Delvoye (Wervik, 1965) es nen Belgischn conceptueeln kunstenoare, die vôorol bekend es deur zyn cloaca.
Controversiële kunste
[bewerkn | brontekst bewerken]Delvoye es upgebrocht in Wervik. Je weunt en werkt in Gent, Londn en New York.
Zyn werkn zyn e middel om uus te confronteern mei de dubbelzinnigeid en schynilligeid van et miens-zyn. Moderne mienschn zyn hygiënisch, technologisch ingesteld, religieus up zoek. Moa in 't echte zyn me wyder ollemoale moa eenvoudige nateurmienschn dien dezelste primitieve behoeftn ein: eetn, kakkn, poarn - juste lik by de beestn.
Deur under expliciet karakter kommn Delvoyes kunstwerkn soms controversieel over. En je gift zelve toe dat'n de provocoasje niet uut de weg wilt goan.
Strountmachine
[bewerkn | brontekst bewerken]De cloaca es ook wel kakmachine of strountmachine genoemd omdat je van voorn eetn moe d'r in kiepern en achter en ende kommn d'r an 't ende echte drolln uut. Olle doagn angt er by de machine eur 3-gangsmenu uut.
Zyn êeste cloaca eit Delvoye gemakt in 2000 en stoat in het MuHKA in Antwerpn, moar ondertusschn zyn der ol vêel nieuwe cloaca's gemakt die overol in de weireld tentôon gespreid zyn: Weenn (2001), Zürich (2001), New York (2002), Düsseldorf (2002), Lyon (2003), Toronto (2004), een turbocloaca in Prato (2004).
De uutwerpseln van de cloaca kun je kopen up de cloaca-website (e-cloaca). Noar eign zeggn verkopt y ze omdat er vroage noar es.
Andere werkn
[bewerkn | brontekst bewerken]Doarvôorn, in 1992, oat y ol tentôongesteld ip Documenta IX woar dat y levende, getatoeëerde zwyns tôonde, onder andere mei Vladimir Lenin zynen kop. Ze kostn d'r in China nie mei lachn; in 2005 mocht'n zyn tentoonstellienge in Peking voortydig stopzettn omdat de Chineezn zyn zwyns giengn doodsloan.
Andere specialiteitn van de kunstenoare zijn faience tiggels me drolln ip, en gotische glasroamn mei d'ofbeeldienge van ne röntgenfoto van e vrouwe die ne vint an 't puupn es.
Up 't Steenakker in Wervik stoat The Kiss, dat es e stanbeeld van twee poarende ertn. 't Roare an da beeld es dan ze nie poarn lik dan beestn doen, nins, ze poarn lik dan mienschn doene (of toch meestol).