Askoy II

Van Wikipedia

Den Askoy II is 't zeiljacht van Jacques Brel woamee dat 'n de weireld roundgereisd hèt.

Geschiedenisse[bewerkn | brontekst bewerken]

Den bôot (20 m lank, 5 m brêed en 40 ton) is in 1960 gebouwd deur d'Antwerpsche scheepswervn Van de Voorde in ipdracht van den architect Hugo Van Kuyck. In de joarn 70 krêeg Jacques Brel de zeilmicrobe te pakkn en in 1974 kwamt 'n noar Antwerpn en wierd 'n smôorverliefd ip den Askoy II. J'het hem ton ook gekocht vo z'n weireldreize. E joar vo dat 'n stierf hèt 'n z'n bôot were verkocht. Achter e poar kêers van eigenoare te zyn veranderd is den bôot serieus beschoadigd in e zwoare storm en uutendelik gestrand in Baylys Beach.

Twi Blanknbergsche zeilfanoatn en fans van Jacques Brel, de broers Staf en Piet Wittevrongel, hèn 't plan ipgevat van zyn gestrand zeiljacht te bergn en te restoreern. Z'hèn doavôorn de VZW Save Askoy II ipgericht. De zwoar beschoadigdn bôot lag vlak by de Nieuw-Zêelandsche kust, gedêeltelik in dryfzand.

De broers hèn Jacques Brel lêern kennen, omdat 'n in 1974 zeils besteld had vo zyn jacht in de zeilmoakerye van de Wittevrongels in Blanknberge. J'hèt doar ook zeillessn gevolgd. Den 28stn juli 1974 ist 'n vanuut Antwerpn vertrokkn ip weireldreize. E joar loater, by den deurtocht van 't Panamakanoal de 15stn ogustus 1975, hè Brel e postkoarte verzoundn noa de Wittevrongels woarip dat 'n geschreevn hèt: "Alles is OK en me goan goed voruut".

Maddly Bamy, de latste levensgezellinne van Brel die met hem meevoarde, steunt 't project van de broers vo den Askoy II e twidde leevn te geevn. In september 2006 is ze noa Blanknberge gekommn en hè ze blommn vastegemakt an de plakkoate van Jacques Brel ounder de viertorre.

Den 14stn december 2007 zyn Staf Wittevrongel en Tjerk Pillen van de VZW Askoy II noa Nieuw-Zêeland vertrokkn vo 't wrak van 't strange weg t'hoaln en voorlopig over te briengn noa Dargaville. Ze zyn doa bygestoan deur Noel Hilliam van 't Dargaville Maritime Museum. De bedoelienge was van den Askoy II noa België were te briengn en te restoreern.

De 16ste meie 2008 is La Cathédrale, lik da Brel zyn bôot noemdege, were in Antwerpn geland achter 34 joar. De 25ste meie ist 'n met URS (unie van Redding en sleepdiensten) noar Ostende gebrocht.

Den 8stn april 2010 is den Askoy overgebrocht noa Rupelmonde woa dat 'n gerestoreerd wordt deur "De Nieuwe Scheldewerven", e bedryf dat doarin gespecialiseerd is.

In de zomer van 2010 wast er e tentôonstellienge roend den Askoy II ip de Piere van Blanknberge. Der was e model van den Askoy II te zien, moar ook e stik stoal dat de VZW Save Askoy II hè kunn krygn van de restn van 't World Trade Center van New York. 't Is uniek in België en 't goa gebruukt wordn by de restoroasje van den Askoy II. Den 11stn september is 't stoal overgebrocht noa Kruibeke en overhandigd deur Robert Faucher, Deputy Chief of Mission by d' Amerikoansche Ambassade, an Burgemêester Denert. 't Goa loater deur Peter Janssens van de Nieuwe Scheldewerven Rupelmonde symbolisch angebracht wordn an 't steurwiel van den Askoy II.

Externe koppeliengn[bewerkn | brontekst bewerken]