Lodewyk II van Hongareye
| 1506-1526 | ||||||
|---|---|---|---|---|---|---|
 |
||||||
 |
||||||
|
||||||
 |
||||||
|
||||||
 |
||||||
|
||||||
|
.
Lodewyk II, Hongoars: II. Lajos (Buda (e stik van Budapest), 1 juli 1506 - Mohács, 29 ogustus 1526) was de vint van Maria van Hongareye. Je was de latste keunienk van Boheemn, Hongareye en Krowoatië van ‘t Huus Jagiello en ridder van de Orde van et Gulden Vlies.
Zyn leevn [bewerkn]
Lodewyk was de zeune van keunienk Vladislav II (of Wladislaus II, Hongoars: II. Ulászló) van Hongareye en zyn derde vrouwe Anne de Foix. An zyn tien joar, in 1516, stierf zyn voader en kwam keizer Maximiliaan I zyn voogd.
Maximiliaan I, ton aartshertog van Ôostnryk, haad deur zyn huwelik mè Maria van Bourgondië, achter heur ounverwachtn dôod in 1482, de feitelikke macht gekreegn over de Lêge Landn en Franche-Comté, ols regent vo zyn vierjoarig zeuntje Filips. In 1486 wierd ie verkoozn tout Rôoms keunienk en 22 joar loater, in 1508, tout keizer van et Hillig Rôoms Ryk. De Brugsche stedeliengn zettegn hem in 1488, in under stryd vor ottonomie, mêer of vier moandn gevangn in under stad.
Zyn trouw [bewerkn]
Van lienks: Maximiliaan I; zyn klêendochter Maria mè Lodewyk II; Vladislav II mè zyn dochter Anna en zyn broere Sigismund II.
Vo den druk te vermindern deur de verdroagn die geslootn woarn tusschn Frankryk, Pooln, Hongareye, Boheemn en Rusland, kwam Maximiliaan in 1515 tegoare mè keunienk Wladislaus II en zyn broere Sigismund I van Pooln, in Weenn . Ze sproakn of vo de twi klêenkienders van Maximiliaan (Ferdinand en Maria), en d’ênigste kienders van van Wladislaus (Anna en Lodewyk) mè makoar te loatn trouwn.
De doar ofgesprookn dubbele trouwfêeste giengt deure ip 22 juli 1515 in de Stephansdom in Weenn en wierd de Wiener Doppelhochzeit genoemd, te zien ip ’n houtsnede deur Albrecht Dürer. Maximiliaan was platsvervanger vo zijn klêenzeune Ferdinand, die zelve nie anwezig was.
Lodewyk trouwde (officieel in 1522) mè Maria. Zyn zuster Anna van Boheemn trouwde mè Ferdinand I, Maria heur broere. Je was aartshertog van Ôostnryk en regeerde ton in noame van zyn broere Keizer Karel V. Je kwam loater ook keizer. ’t Dubbel huwelik zorgde der vôorn dat Hongareye en Boheemn elf joar loater ook by ’t huus Habsburg kwoamn.
O Maximiliaan in 1519 stierf, kwam George van Brandenburg-Ansbach Lodewyk zyn voogd.
Zyn dôod [bewerkn]
De 29stn ogustus 1526 sneuvelde Lodewyk II in de Slag by Mohács teegn sultan Süleyman I de Grôotn van ’t Ottomoans Ryk. J’haad ollêne ’n ounwettige zeune, János Wass, van vo dat ie getrouwd was. Ferdinand I wierd verkoozn ols zyn ipvolger in Boheemn en Hongareye, mo d’Hongoarsche trône wierd betwist deur Janós Szapolyai.
Achter vele conflictn wierd Hongareye in 1541 ipgesplitst in drie stikkn. Ferdinand I krêeg ollêne et keunienklik Hongareye, et nôordwestelik stik van Hongareye da nie in handn van de Turkn was. János Zápolya krêeg Transsylvanië, en ‘t derde stik gieng no Süleyman zelve ounder de noame Ottomoans Hongareye.
Lodewyk zyn weeuwe, Maria van Hongareye, wierd loater deur heur broere Karel V angesteld ols landvoogdesse van de Nederlandn.
 |
Mêer ofbeeldiengn die ier by passn ku je vien in de categorie Louis II of Hungary van Wikimedia Commons. |
