Onze-Lieve-Vrouwekerke (Brugge)
 |
 |
De Onze-Lieve-Vrouwekerke is êen van d'oudste kerkn in Brugge.
Geschiedenisse
[bewerkn | brontekst bewerken]De geschiedenisse van de kerke begunt in de 9ste êeuwe. D’r stound êest e kapelletje buutn de stadswalln. Loater begostn ze me den bouw van e romoansche kerke, die deur de omleggienge van de Reie binn de stad kwam te liggn. Met den bouw van de gotische kerke, lik da ze nu is, begostn ze in de 13ste êeuwe.
De verschillige bouwperiodes zyn binn in de kerke dudelik zichtboar. In de westelikke gevel viend je kenmerkn were van Schelde- of Doorniksche gotiek, lik ’t gebruuk van blauwe stêen uut Doornik en de drie smalle spitsboogveisters. In ’t kôor dat er kwam tusschn 1270 en 1280 is den invloed van de klassieke Fransche gotiek zichtboar.
In de twiddn elft van de 16ste êeuwe, on de vyandelikheedn tusschn Spanje en de Nederlandn ip under hoogtepunt woarn, hieldn de geuzn en de beeldnstorm lêlik huus. ’t Was mor in de 17ste êeuwe dan ze were kostn restoreern en decoreern. Nateurlik in den styl van dien tyd. Dus barokke altoars, biechtstoeln en prikstoel, mo de kerke zelve is gotisch gebleevn.
De bakstêenn torre uut de 14ste êeuwe is 122 meter hoge. Vroeger wast ’n nog hoger, mor in de 18ste êeuwe is de spits zeevntien meter verlêegd. Toch is ’t nog d'hoogste torre van Brugge.
Blikvangers
[bewerkn | brontekst bewerken]- ’t Witmarmern beeld Madonna met Kind, deur den Italioanschn kunstenoare Michelangelo Buonarotti. De Brugsche koopman Jan van Moeskroen kocht ’t beeld in Itoalië in 1506 en schounk ’t an zyn parochiekerke. ’t Beeld is ’t ênigste kunstwerk van Michelangelo dat uut Itoalië uutgevoerd is binst zyn leevn.
- ’t Kôor is ols museum ingericht mè de proalgroavn van Maria van Bourgondië (gotische styl, 1505) en Karel den Stoutn (renaissance, 1562), uutgevoerd in zwarte leisteen mè verguld koper. ’t Grafmonument van de dochter is dus ouder of da van heur voader.
- De fresco’s ip de groavn uut de 13ste en 14ste eeuwe.
- Dertig woapnschildn van ridders van de Orde van et Gulden Vlies.
- Schilderyen en houtn beeldhouwwerkn.
Externe koppelienge
[bewerkn | brontekst bewerken] |
 |
 |
|
Ofbeeldiengn die ier by passn ku je vien in de categorie Onze-Lieve-Vrouwekerk (Brugge) van Wikimedia Commons. |