Garonne

Van Wikipedia

Liggienge van de Garonne
De Garonne by Toulouse

De Garonne (ofte Garona in't Spoans en Cataloans) es 'n riviere van 647 kilomèiters lank in't zuud'n en zuudwestn van Vrankryk die deur de regio's Occitanie en Nouvelle-Aquitaine lôopt. De Garonne strôomt deur de Fransche departementn Haute-Garonne, Tarn-et-Garonne, Lot-et-Garonne en Gironde.

De brounne van de Garonne ligt in de Spoansche Pyreneeën, ol kunn'n ze nie mè zekereyd zegg'n wukke brounne nu precis dedie van de Garonne es. By Bagnères-de-Luchon strôomt ze Vrankryk binn'n en lôopt olangsn Saint-Gaudens nôordwoarts tout in Toulouse. Doa komt ze tôope mè 't Canal du Midi en buugt of noar 't nôordwestn. Via 't Canal du Midi kun je ôostwoarts richtienge de Middellandsche Zêe voarn. De Garonne es ier nog nie te bevoarn vo grôote bôotn en ezo wordt de commerciëlle scheepvoart van Toulouse tout Castets-en-Dorthe deur 't Lateroal kanoal van de Garonne gezound'n (e kanoal da parallel lôopt mè de riviere). De Garonne passeert vodder langsn de steed'n Castelsarrasin en Agen.

Vanof de plekke Langon es de Garonne brêeder en ol wa beter te bevoarn vo grôote rivierbôotn en vanof Bordeaux, woa der e grôote hoavn es, es de Garonne ôok bevoarboar vo zêescheepn. Ierachter komt ze tôope mè de Dordogne by de plekke Ambès (juust o de nôordkantn van Bordeaux) en vormt ezo 't estuoarium van de Gironde. Uutendelyk moundt dedie uut in d'Atlantische Oceoane (mêer bepoald de Golf van Biskaje).

De belangrykste zyrivier'n van de Garonne zyn d'Ariège (170 km), de Gimone (136 km), de Save (148 km), de Gers (175 km), de Tarn (380 km) en de Lot (481 km).

Wikimedia Commons