Hoagemussche

Van Wikipedia
Ga naar: Begunplekkn, zoeken

Hoagemusschn (Prunella modularis, AN: Heggenmus) zyn zangveugels uut de familie van de hoagemusschn, woarin dan der buutn de geweune hoagemussche nog 12 aar sôortn zittn.

Verspreidienge en leefgebied[bewerkn | brontekst bewerken]

't Zyn mo 2 sôortn hoagemusschn die in Europa zittn, de geweune hoagemussche (die hêel 't joar in nuuzn coté te viendn is) en de Alpnhoagemussche (Prunella collaris), die verre nie in België leeft. Ze zittn in verre hêel Europa, buutn hêel in 't nôordn en in Ysland. In Spanje en Italië kuj ze in zomer ollêne viendn in 't nôordn, in de wienter goan de nôordelikke veugels wel mêer no 't zuudn, toune vliegn ze oek toet in 'n nôordn van Afrika. In 't ôostn zittn ze toet an de Oeral.

Ze zyn oek uutezet in Nieuw-Zêeland en êentige eilandn nie verre dervan, lik Chatham en Campbell Island, woa dan ze goed broedn.

In de weireld zoudn der bykan 30 meljoen koppels zyn, woavan da 95% in Europa zit. Landn me mêer of êen meljoen koppels zyn Finland, Rusland, 't Verênigd Keunienkryk, Zweedn, Nôorweegn en Duutsland. 'n Hoeveelheid go nie achteruut, 't zyn der 't mêeste by ekommn up 't ende van de 19ste êeuwe, toune an der mêer en mêer hovetjes bykwaamn, doavan hen hoagemusschn, juuste lik meireloars.

Ol hier zyn ze surtout te viendn an de bôordn van busschn, in parkn en in hovetjes. Ze zittn oek in noaldbusschn, mo doa zyn der miender per hectoare.

Beschryvienge[bewerkn | brontekst bewerken]

Olhoewel dan de menschn der oek mussche teegn zeggn, is 't in 't hêle gin mussche (Passer), mor en hoagemussche. Ze zyn e twoddetje klinder (lik e rôobost en z'hen oek en aarn bek, die langer en scherper is voun fernient te kunn pakken. 't Is surtout dadde dan ze eetn in de zomer, in de wienter trekkn ze nunder plang me bottn en fyn zoad. 't Is oek toune dan ze mêestol in hovetjes te viendn zyn.

Aar verschilln zyn met e mussche, is nunder kleur, ze zyn vanoundern, an nundern kop an e riengel an nunder nekke dounkergrysde.

't Ku zyn dan ze mêer of 1 vintje of wuvetje hen, dat gebeurt a nunder territorium overlapt. De puppe legt in e nest die in e struke emakt is, van taksjes en ges met doarup mos en toune nog eki pluumtjes en hoar. Ze legt twi kirs tout 6 eiers, in april en juni, d'êeste eiers goan wel mêestol te kweiste. An de joungn uut 't ei kommn, achter da 't er twi weekn up ebroed is, krygn ze e dag of 14 teetn, toune vliegn ze uut.

Externe koppelienge[bewerkn | brontekst bewerken]