Hugo van der Goes

Van Wikipedia
Ga naar: Begunplekkn, zoeken
Dood van Maria: Van der Goes ip zyn oogtepunt.

Hugo van der Goes (Gent, ca. 1442 - Oudergem, 1482) was e kunstschilder uut de twiddn elft van de 15e êeuwe. Je makte deel uut van de schole van de Vlamsche Primitievn.

Zyn leevn[bewerkn | brontekst bewerken]

Over den êestn elft van z’n leevn ist er bykan nieks geweetn.

Je zou round 1442 in Gent geboorn zyn. Van 1467 wast 'n mêester in de schildersgilde van Gent. Je werkte doa tien joar en je krêeg ipdrachtn van ’t stadsbestier, de kerkelikke instelliengn en de Bourgondische ertoogn.

In 1477, ip ’t oogtepunt van z’n loopboane, et ’n em gevestigd ols conversbroeder (e sôorte leeknbroeder) in ’t Rôod Klôoster in ’t Zoniënwoud by Brussel, mo je blêef ipdrachtn uutvoern.

J’a last van depressies en in 1481 krêegt ie 'n inzienkienge. Je zou ’t werk De dood van Maria in de latste fase van z’n leevn gemakt en.

Je stierf in 1482.

Zyn werk[bewerkn | brontekst bewerken]

Z’n mêesterwerk, de Portinari - triptiek (Galleria degli Uffizi, Florence), is van z’n Gentse periode (1467-1477). ’t Drieluuk was in ipdracht gemakt van Tommaso Portinari, de vertegenwoordiger in Brugge van de Medicifamilie, de Florentynsche bankiersfamilie en belangrykste geldschieters van de Bourgondische ertoogn.

’t Centroal panêel is de Anbiddienge van d’erders. Ip de zypanêeln zyn de Portinari’s ofgebeeld met under beschermillign. 't Feit dan de Portinari's zo klêene ofgebeeld zyn et e symbolische betekenisse en toogt under lêegere rang.

Z’n latste voltôoid werk De dood van Maria (Groeningemuseum, Brugge) et ’n verzekers round 1470 gemakt vo de Duunnabdy van Koksyde. ’t Wordt anzien ols êen van de belangrykste mêesterwerkn van de 15e êeuwe. Kenmerknd vo ’t werk is de realistische, expressieve weergoave van de figeurn en de bewegiengn.

D'r stoa nievers e signateure of joartal ip z'n panêeln en doarom is de daterienge van z'n werkn styf moeilik t'achteroaln.

Hugo van der Goes is lik Jan van Eyck en Rogier van der Weyden ’n allêenstoand fenomeen. J’inspireerdeg' ook veel generoaties kunstenoars en je wordt anzien ols de modernstn van de Vlamsche Primitievn.

Portinari - triptiek
Wikimedia Commons