Jean-Marie Dedecker
.jpg)
- Dit artikel es geschreevn in 't Ostends, en da zou best ozô bluuvn.
Jean-Marie Dedecker (Nieuwpoort, 13 juni 1952) et eigelik twee leevns g'et: een as coach van Belgiës mèèst succesrieke judoka's (o.a. Gella Vandecaveye en Ulla Werbrouck) en êen as polletieker. Van 1999 toet 2006 wast 'n lid van de VLD. Achter e kort lidmoatschap van d'n N-VA ende 2006, kwamt 'n up met 'n eign partië, Lijst Dedecker, woavôorn dat 'n toet 2014 in 't parlement zetelde. Sedertdiën hèt de partië allêne nog moar e lokale ofdêlienge in Middelkerke, woar da Dedecker in 2019 burgemêester kwam. In da zelfste joar wierd ie hem as oenofhankelikn ip d'n N-VA-lyste were verkoozn in 't parlement.
Judocoach
[bewerkn | brontekst bewerken]In de joarn '80 en '90 was 't 'n de bezieler va de Belgische judo: de meest bekende vanuut West-Vlams standpunt zyn nateurlik Gella Vandecaveye en Ulla Werbrouck, mo andere zien Ingrid Berghmans, Robert Van De Walle (in Ostende geboorn), Johan en Philip Laats, Harry Van Barneveld, Heidi Rakels, Inge Clement en Marie Isabelle Lomba. Tegoare en ze oegeveer 130 medailles behoald.
Polletieker
[bewerkn | brontekst bewerken]Achter ze periode as judocoach is 't 'n in de polletiek gestapt, meer bepoald by de Open VLD. Je zeg't lik oe da 't is, en doardeure et 'n vele gebotst met de partytop, mo agezien da'n e stemmetrekker is, durfdn ze ni teegn z'n karre te ryen, toet achter de gemeenteroadsverkieziengn van 2006.
Z'n oofdprobleem met de Open VLD was dat 'n vound dat die party tevele no lienks gienk, woadeure da ze veel stemmn verloorn an 't Vlams Belang. Andere zeggn dat 'n tevele meedei met de extreem-rechsche, en ze doadeure tevele in de koarte speelde. In Ostende stound 'n tegenover Johan Vande Lanotte van de sosn. Je kost de meerderheid ni breekn.
In 2006, achter de gemeenteroadsverkieziengn, et de party beslootn - achter de klassieke Dedecker-rutteliengn in de gazettn en televisje, en up vrage va Bart Tommelein in Ostende - voe Dedecker uut de VLD te smytn.
Vo ene ki zegt Dedecker nie vele: je vergoadert dat 'n zwit, ier en doar, ounder andre me Hugo Coveliers en richt ne VZW en polletieke "denktank" en VZW Cassandra ip.
Ip 29 november 2006 koundigde em af dat em overstapte no de N-VA. De volgende dag al zeidt de CD&V da ze 't kartel met de N-VA ni mi zaagn zittn ip die manier.
Ip 9 december koost de N-VA vo 't kartel, woarip da Jean-Marie Dedecker de party noodgedwoengn verliet. Begun 2007 kondigde ie an dat 'n een eign party iprichtige, Lijst Dedecker, met als slogan gezond verstand. By de federoale verkiezingn van 10 juni 2007 oalde Lijst Dedecker vele meer of wuk da de opiniepeiliengn agaavn: 5 kamerzetels en 1 senateur.
Jean-Marie Dedecker is ook e polletieker va stunts: in 2002 smokkelde em e journalist toe by Marc Dutroux. In 2004 oalde 'm 38% van de Open VLD stemmn in en verkiezienge voe VLD-voorzitter. Een ounverwacht oge score, gelet up 't verzet van de partytop tegen ze kandidateure.
- 1999 - 2004 Senateur
- 2004 - nu Volksvertegenwoordiger
- 2001 - nu Gemeenteroadslid Ostende
Externe koppelienge
[bewerkn | brontekst bewerken]
|
Ofbeeldiengn die ier by passn ku je vien in de categorie Jean-Marie Dedecker van Wikimedia Commons. |