Johanna van Kastilië

Johanna van Kastilië

1479 – 1555
Johanna van Kastilië
Keuniginne van Kastilië (titel). Regentschap: Ferdinand II en Filips I van Kastilië (den Schoonn)
Periode 1504 – 1555 Vôorganger Isabella I van Kastilië Ipvolger Isabella van Portugal (1503-1539), keuniginne van Spanje
Voader Ferdinand II van Aragon Moeder Isabella I van Kastilië

Johanna van Kastilië, ôok wel Johanna van Aragon genoamd, bygenoamd de Woanzinnige, (Spoans: Juana la Loca) Toledo (Spanje), 6 november 1479 - Tordesillas, 12 april 1555), was en dochter van de katholieke keuniengn Ferdinand II van Aragón en Isabella en d'oudere zuster van Catharina van Aragón, keuniginne van Iengeland en eeste vrouwe van Hendrik VIII.

D'n twintigstn oktober 1496 trouwde ze me Filips den Schoonn, zeune van Maximiliaan van Oostnryk en Maria van Bourgondië.

Achter de dood van eur enigste broere, de kroonprins Johan van Aragon en Kastilië en prins van Asturië, die getrouwd was me Margaretha van Oostnryk, en ook van eur oudste zuster Isabella van Portugal en eur zeuntje Miguel, wierd ze in 1502 erkend deur de cortes ols troonipvolgster. Ze was prinses van Asturië. Achter de dood van eur moeder in 1504 was ze keuniginne, mo ze was nie in stoat vo te regeern. Die toake wierd overgenoomn deur eur voader en eur vint.

Ze was de moeder van twêe keizers van ’t Illig Rôoms Ryk, Karel V en Ferdinand I, en van vier keuniginn:

• Elenora, keuniginne van Portugal, vrouwe van Emanuel I en loater keuniginne van Frankryk als vrouwe van François I.
• Isabella, keuniginne van Denemarken, vrouwe van Christiaan II.
• Maria, keuniginne van Hongareye, vrouwe van Lodewyk II
• Catharina, keuniginne van Portugal, vrouwe van Johan III.

Johanna de Woanzinnige mag nie verward weirdn me de Portugeesche Johanna van Kastilië (1462-1530), een prinsesse van Kastilië die deur eur uwelyk me Alfons V van Portugal (1432-1481) keuniginne van Portugal was van 1475 tot 1481.

Dood van Filips

Doña Juana la Loca, schildery uut 1877 van Francisco Pradilla y Ortiz, Pradomuseum, Madrid.

In 1506, up zyn 28e, is Filips gestorvn. Johanna kost de dood van eur vint nie verwerkn woadeure dat eur woanzinnigeid nog verergerde. Ze sloot eur of van de weireld en ze kost nie schêen van Filips’ doodskiste. Ze doolde d'r overol mee round, wat da loater leidde tout eur bynoame Johanna de Woanzinnige. Toch bleef z’eur titel theoretisch oudn tou an eur dood in 1555.

Externe koppelienge

• Portret in Digitaal Vrouwenlexicon