Joris Dumery

Van Wikipedia
Naar navigatie springen Naar zoeken springen
Dat artikel es oorsprounkelik geschreevn in 't Noordelik West-Vlams.

Joris Dumery (schildery van Mathias De Visch).

Joris Dumery (Opzullik, 1715 - Brugge, 1 ogustus 1787) was een bekende klokkegietre en bowre van verschillnde beijoars.

Leevnslôop[bewerkn | brontekst bewerken]

Y was getrowd mê Maria d'Hondt uut Hilvarenbeek (Nôord-Broabant), die stamde uut e famielje van orloozjemoakrs. Y gienk in de lêer by Alexius Jullien in Lier en werkte vanof 1736 lik zeifstandige klokkegietre.

Vo de bow van de niewe beijoard in d' alletorre van Brugge kwamtn in 1744 in die stad weunn en wierdr pôortre in 1750. Y goot al de 47 klokkn van de beijoard. Sommigte doavan wordn nu bewoard in 't Gruutuuzemuseum. Y gôot ook de beijoars van Tielt, Kortryke, Oarelbeke en Toeroet in West-Vloandern en vors van Sint-Martens-Lierde, Oalst, Zottegem, Ninove, Edingen en Chimay.

Ook gôotn ofzoenderlikke klokkn vo d' Antwerpsche Sint-Jakobskerke, vo de Mechelsche Sint-Romboutskateedroale, vo de Brugsche kerken gewyd an Sint-Salvator, Sint-Gillis en Sint-Anna en vo veele dorpskerkn.

Y gôot ook bronzn kunstvôorwerpn, lik de dolfyne die lik oopnboare woatrepoempe wierd geplatst an 'het staelyser' (nu in 't binnen'of van 't Groeniengemuseum).

Ipvolgienge[bewerkn | brontekst bewerken]

Zyn zeune, Willem (1745-1793), vôgde zyn voadre ip in 1784. Noast klokkn, gôot y ook kooprn en broenzn kandloars, kruusbeeldn en kôorlessenoars. Vo de Sint-Walburgakerke in Brugge, gôot y e kooprn leezenoare.

Willem wierd ipgevôgd deur zyn twêe zeuns, Willem jr. (1772-1848) en Jacob (1773-1836), die dezeifste stiel deejn. Zysre gôotn klokkn vo 't Oed Sint-Jan in Brugge.

De produuksje wierd bemoejlikt deur de Fransche Rivoluusje. Achtre 't oovrelien van de broers wierd 't bedryf nog e poar joar vôortgezet toe in 1855.

Lik êerbetôon an Joris Dumery wierd e dêel van de Boeveriestroate êrdopt no Joris Dumerypling en wierdr 'n oetn staketsle mê klokke geplatst.

E bitje voddr kykn[bewerkn | brontekst bewerken]

  • (nl) Roose, Firmin1973 : Georgius Dumery, klokkengieter op West-Brugge, in : Brugse Figuren, Handzame.
  • (nl) Dacquin, Hedwig & Formesyn, Martin (red.) 1984 : Brugge, Belfort en Beiaard, Brugge, met onder meer:
    • (nl) De Blauwe, Jacques : Dumery, een naam die klinkt als een klok, blz. 63-73.
    • (nl) Meulemeester, Jean-Luc : De familie Dumery en de Sint-Walburgakerk in Brugge, blz. 74-79.
  • (nl) De Vos, Dirk & De Vos, Dominique : 1991 : Catalogus van de belangrijkste aanwinsten schilderkunst, in : Jaarboek 1989-90, Stad Brugge. Stedelijke Musea, Brugge, p. 30-33, ill. (portretten familie Dumery)
  • (nl) Formesyn, Martin 1993 : Klokkenspellen en beiaarden in West-Vlaanderen, Brugge.
  • (nl) Le Loup, Willy 1996 : Joris Dumery, in : Lexicon van Westvlaamse beeldende kunstenaars, Deel 5, Brugge.