Joseph Ferdinand van Beyern

Van Wikipedia
Ga naar: Begunplekkn, zoeken
Dat artikel es oorsprounkelik geschreevn in 't Kustwestvlams.

Prins Joseph van Beyern, geschilderd deur Joseph Vivien

Joseph Ferdinand Leopold van Beyern (Weenn, 28 oktober 1692 - Brussel, 6 februoari 1699), was e prins van 't keurvorstndom Beyern. Je was den angeweezn trôonipvolger van zyn voader Maximilian II Emanuel van Beyern en van keunienk Carlos II van Spanje. Je was e prins van 't Huus Wittelsbach.

Leevn[bewerkn | brontekst bewerken]

Joseph Ferdinand is geboorn ip Hofburg, e paleis in Weenn, ols derde zeune van keurvorst Maximilian II Emanuel van Beyern en eirtshertoginne Maria Antonia van Ôostnyk, dochter van keizer Leopold I en infante Margaretha Theresia, dochter van keunienk Felipe IV van Spanje.

Deur de Republiek van de Verênigde Nederlandn en 't keunienkryk Iengeland was Jozef Ferdinand angeweezn ols kandidoat vo keunienk Carlos II ip te volgn ols keunienk van Spanje, omdat 'n zelve gêen joengers had.

Keunienk Carlos II koos hem uutendelik ols zyn erfgenoam. Moa Joseph Ferdinand stierf in februoari 1699 ip zesjoarige leeftyd, drie moandn achter da Frankryk, Iengeland en de Republiek in oktober 1698 't Verdrag van Den Haag oendertêekndn, woarin da gereegeld wierd da Joseph Ferdinand erfipvolger in 't keunienkryk Spanje zou kommn.

Joseph Ferdinand stierf in Brussel ip 6 februoari 1699. Zyn dôod kwam styf oenverwacht. 't Joengetje krêeg convulsjes, je most overgeevn en je was lange tyd van zyn zelvn.

D' omstandigheedn roend zyn dôod bluuvn mysterieus. Der woarn geruchtn dat 'n vergiftigd zou gewist zyn deur kriengn roend 't Weens hof, moa 't zyn doa gêen bewyzn vôorn. Zyn voader keurvorst Maximiliaan II Emanuel geloofde die geruchtn. Zyn wissel noa de Fransche kant in de kommnde Spoansche Successieoorloge wierd deur sommigte doa mee in verband gebrocht.

't Stoffelik overschot van Joseph Ferdinand wierd bygezet in de Kathedroale van Sint-Michiel en Sint-Goedele in Brussel.

Joseph Ferdinand wierd ols krôonprins van Beyern ipgevolgd deur zyn joengere halfbroere Karl Albrecht.

Wikimedia Commons