Lissabon

Van Wikipedia
Naar navigatie springen Naar zoeken springen
Portugal Lissabon
Crest of Lisboa.png
Montagem de Lisboa.png
Regio Lissabon
District Lissabon
Coördinoatn 38°43′NB 9°10′WL
Ippervlak 100,05 km²
Inweuners 509.515
(5.093/km²)
Website www.lisboa.pt
LocalLisboa.svg
Liggynge van Lissabon in Portugal

Lissabon (Portugees: Lisboa) is den hoofdstad en grotste stad van Portugal. De stad ligt in 't westn van 't Iberisch Schiereiland ip de rechteroever van de riviere de Taag, dichte by den Atlantischn Oceoan.

Beziensweirdigheedn[bewerkn | brontekst bewerken]

Baixa Pombalina, de 'beneenstad', is 't center van Lissabon met de Dominicoannkerke. E bitje verder ligt de Praça dos Restauradores mè tusschn de twèe pleings de stoasje Rossio. An de riviere de Taag ligt 't pleing Praça do Comércio met de toegangspoorte Arco da Rua Augusta. Doa was vroeger 't Ribeirapaleis, de keunynklyke residensje.

In de wyk Bairro Alto, te westn van de Baixa, zyn vele restaurangs en uytgoansplekn te vyndn. De dertig meter hoger geleegn wyk is vanuyt 't center te bereikn met e lifte, den Elevador de Santa Justa in neogotische styl van roend 1900.

Tusschn de Baixa Pombalina en de Bairro Alto ligt de wyk Chiado. E goeie tweihoenderd joar achter d' eirdbevynge van 1755 wierd de wyk geploagd deur e nieuwe rampe, de brand van 1988. 't Carmoklooster, 't Teatro Nacional de São Carlos en 't beroemd Café A Brasileira (mè 't beeld van trouwe bezoeker Fernando Pessoa ip 't terras) zyn te vyndn in die toeristische wyk.

Ten oostn van 't center ligt Alfama, 'n oude volkswyk. Met heur smalle, steile stratjes en trapn is 't de moeite vo te bezoekn. Dweis deur de wyk kroenkelt tramlyne 28, woarip da nostalgische trams riën. De bekendste en oudste kerke van de stad, de kathedroale van Lissabon, en 't klooster van São Vicente de Fora zyn doa te vyndn.

De voorstad Santa Maria de Belém ligt te westn van 't center. Doar hè je 't Hiëronymusklooster Mosteiro dos Jerónimos en de Torre de Belém, alletweie weirelderfgoed. In 't klooster ligt o.a. den oentdekkyngsreiziger Vasco da Gama begroavn. In die wyk is ook 't Padrão dos Descobrimentos te ziën, e monument geleegn an den oever van de Taag en gebouwd en herbouwd ter eire van de Portugeesche zeivoarders.

Enigte kilometers ten oostn van 't center ligt 't Parque das Nações, bekend van Expo '98, mè 't aquarium Oceanário de Lisboa, 't Vasco da Gama-wynkelcenter, de Torre Vasco da Gama, e koabelboane en de treingstoasje Gare do Oriente.

De stad hèt twèe beziensweirdige brugn. De vroegere Ponte Salazar, achter de val van zyn regime ommegedopt toet Ponte 25 de Abril, noa d' Anjerrevoluusje in 1974, verbyndt Lissabon met de Outra Banda, de zuydoever van de Taag. 't Oentwerp is van de zelfste firma lyk van de Golden Gate Bridge in San Francisco. Ip dezelfste oever stoat 't groot beeld Christus keunynk, die uytkykt over Lissabon. Te noordn van 't Parque das Nações ist er e nieuwere brugge over de Taag, de 17 kilometer lange Vasco da Gama-brugge.

In 't Museu Nacional de Arte Antiga, 't belangrykste kunstmuseum van Portugal, is oender andere vele werk te ziën van Noord-Europeesche kunstschilders lyk Jeroen Bosch en Albrecht Dürer.