Piere (Blanknberge)

Van Wikipedia
De Piere van Blanknberge in 2009
Êeste Blanknbergsche piere, gebouwd in 1894
Overbluufsel van d' êeste piere achter dan de Duutschers 't gebouw in brande gestookn han den 30stn oktober 1914

De Piere van Blanknberge is d' ênigste recreatieve piere van België, an de Vlamsche Kust. 't Is en uniek bouwwerk met e wandelbrugge van 350 m lank in zêe. D' êeste Blanknbergsche piere dateert van 1894.

Geschiedenisse[bewerkn | brontekst bewerken]

1894 - 1914

D' êeste piern zyn were te viendn in Iengeland in 't middn van de 19ste êeuwe. 't Is moa vanof den twiddn helt van de 19ste êeuwe da pieren e toeristische attracsje gewordn zyn vo wandeloars. In Iengeland wierdn ze pleasure piers genoemd. Vanof de joarn 1870 zochtn Iengelsche ingenieurs en architectn ook g'interesseerdn ip 't continent.

't Was e Londenoare, John Hendrey, die in 1873 en êeste vôorstel dêed an de stad Blanknberge vor e piere te bouwn ter hoogte van de Kerkstroate. Da vôorstel wierd ofgeweezn deur 't gemêentebestier. In 1888 wierd er e vôorstel uutgewerkt deur ingenieur Casse, architect Hellemans en annemer Monnoyer. In 1889 was 't stadsbestier akkoord en ze stichtegen de Société Anonyme du Pier de Blankenberghe. De werkn an de piere begostn in februoari 1894 en de 12stn ogustus 1894 ip e zundag, mochtn d' êeste wandeloars der al ip. De piere in Art Nouveaustyl wierd al gauwe en echte attracsje an de Vlamsche Kust.

Den 30stn oktober 1914 (êeste weireldoorloge), is de piere hêlegans ofgebrand gewist deur de Duutsche bezetter.

1933 - 2005

Achter den êeste weireldoorloge zocht 't stadsbestier van Blanknberge en iplossienge vo 't lêlik skelet van de piere ip 't strange van Blanknberge. Ze kochtn de piere over van de vroegere moatschappie vor e bedrag van 435 000 BEF (€10 800). Deur d' oorlogsschoavergoedienge da ze gekreegn hen van om en by de 900 000 BEF (€20 000) kostn ze begunn droomn van e nieuwe piere.

In 1930 besliste de stad vo zelve e nieuwe piere te bouwn. 't Ountwerp was van de Blanknbergenoare Jules Soete en je wierd bygestoan deur de Gentenoars professor Gustaaf Magnel en ingenieur architect A. Bouquet. De 9ste juli 1933 is de nieuwe piere ing'huldigd.

Binst de twidde weireldoorloge blêef de piere intact deurdat den Duuts Karl-Heinz Keseberg 't bevel van z'n overstn negeerde vo de Blanknbergsche piere te dynamiteern. Tusschn Keseberg en 't Blanknbergs stadsbestier ist er assan e vriendschapsband bluuvn bestoan. Van tyd kwamt 'n vor e korte vakanse me ze vrouwe en zeune en loater me ze klêenjoungers. In 1994 is de Duutsche sergeant g'huldigd gewist deur de stad Blanknberge. In november 2006 krêeg Blanknberge 't bericht dat de redder van de piere ip 85-joarige leeftyd gestorvn was.

Achter den oorloge is de piere ommegedopt toet Aquarama en van 1955 toet 1999 is 't gebouw ounderdêel gewordn van 't Meli-pretpark (nu Plopsaland) in Adinkerke.

In 2003 is de piere gerenoveerd en in 2004 is de concesje verkocht an Traincity, moa dat he moa gedeurd toet in 2005.

In de zomer van 2008 giengt er en exposiesje deure over al de pieren in de weireld, de World Piers Exhibition 2008.

Externe koppeliengn[bewerkn | brontekst bewerken]

Wikimedia Commons