Riengvoart (Brugge)

Van Wikipedia
Riengvoart

De Riengvoart in Brugge is 't kanoal da round 't ôosten en 't nôorden van 't center van stad lopt, langs d' oude vestn en neffest de stadsrienk R30. Officiêel hêet het kanoal nie de "Riengvoart", angezien da 't een ounderdêel is van 't kanoal Gent-Brugge-Ostende.

Geschiedenisse[bewerkn | brontekst bewerken]

Vroeger endigde den Ostensche Voart teegn de Dampôorte, binst dat de Gentsche Voart an 't Minnewoater begost. Vo van 't êne kanoal noa 't andere te geraakn moest je rechte deur Brugge voarn. Noarmoate dan de bôotn grôter wierdn moestn de woaterweegn deur Brugge verdiept wordn. Da was nu wel meugelik vo de Langereie en de Sint-Annareie, moa vo 't dêel tusschn de Meulebrugge en 't Minnewoater was da nie te doen. Doavan wierd er t' olverwege de 17e êeuwe beslootn een nieuw kanoal te graavn tusschn de Meulebrugge en de vestn juuste ten nôordn van de Gentpôorte: de Coupeure. Verder wierd er vanof da punt ook de vestiengsgracht toet an de Gentsche Voart geschikt gemakt vo de scheepvoart. T' olverwege de 19e êeuwe wierd de vestiengsgracht tusschn de Coupeure en de Dampôorte ook bevoarboar gemakt en wierdn der an de Dampôorte nieuwe sluuzn gebouwd. Doamee was de riengvoart gelik da m' hem nu kenn'n volledig.

Traject[bewerkn | brontekst bewerken]

De Riengvoart begint, as 't verlengde van de Gentsche Voart, an de Katelynebrugge, ten zuudn van de binnenstad. Beholve d' hoge brugge noa de stoasje liggn der zeven bruggn over de Riengvoart: an de Katelynepôorte, de Gentpôorte, de Kruuspôorte, twê and de Dampôorte, de Warande en de Krakêle. Verder wordt het ton den Ostensche Voart. Tusschn de Dampôorte en de Krakêle lopt de Riengvoart deur de Handelskomme en de Vlotkomme van den oude binn'nhaavn.

Van de Riengvoart zyn der nog verbiendiengn noar een poar andere kanoaln: tusschn de Gentpôorte en de Kruuspôorte goat Coupeure in 't stad, an de Dampôorte is 't er een verbiendienge noa de Langereie end de Damsche Voart, en an de Vlotkomme verbiendt de Boudewynssluze de Riengvoart met 't Boudewynkanoal noa Zêebrugge. Beholve de verbiendienge noa 't Boudewynkanoal zyn ol die oftakkiengn nu ofgeslootn.

Wikimedia Commons