Snæfellsnes

Dat artikel es geschreevn in 't Kustwestvlams.

Snæfellsnes is e schiereiland van Ysland tusschn de boaie Faxaflói in 't zuudn, en de fjord Breiðafjörður in 't nôorden. In ôost-westelike richtienge lopt er e bergkeetn over hêel de lengte, en 't hoogste punt dervan is de 1446 meter hoge Snæfellsjökull, e vulkoan woar dat er e gletsjer (jökull) ip ligt.

Ip Snæfellsnes zyn der vele sôortn landschapn te viendn, lik vulkoann, lavaveldn, klifn, grotn, woatervaln, meern, warme en koude woaterbronn enz. E specialiteit is dat er mêerdere bronn zyn woar dat er echt borrelnd koolzeurhoudnd mineroalwoater noar omhoge komt.

Ênigte dorpn en klêene stadjes an de nôordkant van Snæfellsnes zyn Rif, Ólafsvík, Grundarfjörður en Stykkishólmur. An de zuudkust lign de pleksjes Arnarstapi en Hellnar. In 't westn lign Dritvík en Beruvík, twèe vroegere visscherspleksjes die nu verloatn zyn.

By Hellissandur (vlak by Rif) stoat d' hoogste construucsje van West-Europa, de zendmast van 't Zendstasjong Gufuskálar.

Snæfellsjökull
Gatklettur by Arnarstapi
Grundarfjörður

Ofbeeldiengn die ier by passn ku je vien in de categorie Snæfellsnes van Wikimedia Commons.