Stêenstroate (stroate)
De Stêenstroate (Steenstraat) is een oede stroate deur e deel West-Vlamse gemeentn. De stroate ed e geschiedenisse die weregoat toet in de Romeinse tyd.
De stroate is een oede verbiediengsweg (diverticulum) tusschn Kassel in Noord-Vrankryk en Eirdnburg in wuk dat tegenwoordig Zeeuws-Vloandern is. Meugelyks bestound die stroate ol van voorn de Romeinse tyd, en is 't 'n deur under rechte getrokk'n of verhard, of j'is nieuwe ageleid achter de transgressei van de zee. De verharde boane et eeuwnlang bluuvn bestoan.
Hele stikk'n van da rechte tracée bestoan nog oltnd, en in verschillnde gemeentn et de stroate zelfs nog die stroatnoame. In 't centrum van de provinsje ligt er meer dan 10 km Steenstroate tusschn de Rudenberg en de Blankaart in Diksmude. Vanof de Rudenberg vormt de Steenstroate de grenze tusschn Kookloare en Andzoame, tonne lopt de stroate deur Werken langs 't dorpcentrum. De boane stikt doa den Andzoamevoart over en lopt tonne Eesn binn. E bitje verder is de stroate de grenze tusschn Klerkn en Eesn en tonne de grenze tusschn Woomn en Tjoenkesove. In Eesn ligt de Steenstroate e poar kilometer in kassien, en is 't er sinds 1992 e beschermd landschap[1].
Vanof de Rudenberg noa 't noordn toe, is 't traject in Ichtegem were te viendn in de Ruidenbergstraat en de Zuster Clarastraat. Meer noa 't noordn toe liggn der were stikk'n stroate in Wyndoale en Erdryke met de noame Stêenstroate. In Wyndoale zyn der overbluufsels va Romeins erdewerk gevoen. In die streke lag 't er e knooppunt met twi andre Romeinse verbiendiengsweegn, de Brugschen Heirweg en de Zeeweg.
Toet in de Middeleeuwn was die weg, 'thope met andere oude boann, e belangryken oofdweg. 't Is moar in den Oostenriekse tyd dat andere boann de rolle overpakte, meerbepoald de boane Brugge-Toeroet-Roeseloare-Meenn uut 1754, de boane Toeroet-Wyndoale-Ostende uut 1765 en de boane Wyndoale-Diksmude uut 1769.
Zied ook noa[bewerkn | brontekst bewerken]
Referensjes[bewerkn | brontekst bewerken]
- ↑ De Steenstraat - Onroerend Erfgoed - beschermingsfiche