Walpling

Dat artikel es geschreevn in 't Noordelik West-Vlams.

't Walpling is e pling in 't centrum van Brugge. 't Pling goa van de Wyngoardstroate in 't Zuudn no de Walstroate in 't Ôostn, no Zonnekemeers in 't Westn en de Stoofstroate in 't Nôordn.

Geschiednisse

't Walpling zoe vôgns de mêest gangboare ipvattienge zyn noame te dankn ên an de nabyeid van d' êeste vestn of omwollienge van de stad, die in 1127 angeleid wierd. Ip de mêeste ofdrukkn van 't Brugsche stadsplang, getêeknd deur Marcus Gerards, gegraveerd in 't joar 1562, wordt 't eevnwêl "Woals Pling" hêetn, wa da sommigtn ê doen veroenderstelln dat de Franstoalige kommêrsantn (Woaln en Fransmans) dr tegoare kwoamn vor andle te dryvn. Die veroenderstellienge is nie zjuuste. De toevoegienge van stroatnoamn en legendn ip 't plang van Gerards gebeurde pas in de 18ste êewe en is nie betrowboar.

In de 19ste êewe wierd 't pling oendremêer gekenmerkt deur d' anweezigeid van lêerlôojeryn en blowververyn. 't Beviendt êm teegnwôordig ip de toeriestiesche wandlroete van 't Begynof lanst 't Memlienkmuzeum no 't Groeniengemuzeum en de Burg. 't Is ton ook e drukke toeriestiesche deurgangs- en pleistreplatse. De boomn, die in belangryke moate mee 't karaktre van de plekke bepoaln, wierden pas in 1903 angeplant. In 1982 wierd 't Walpling êraangeleid en wierdr e bronzn beeldowwerk van de Westvlamsche kunstnoare Jef Claerhout geplatst.

An 't pling en in de beurt ên dr ook oltyd, en dadde te minstn vanof de 16ste êewe, broweryn gestoan. Vandoage de dag vienje dr nog de êenigte aktieve browery van de binnestad: Browery D’ Oave Moane wierd gesticht in 1856 en wordt têegnwôordig geleid deur de zesde generoasje van de stichtersfamielje. Nu wordn dr de biern "Brugse Zot" en "Straffe Hendrik" gebrown.

't Godsuus 'Le Maire' is ook te vienn an 't Walpling. 't Wierd in 1910 gesticht in een verbowd 17ste êews pakuus, woa an de tuunkant nog e poar uuzetjes en e klêene kapelle bygebowd wierdn.

E bitje voddr kykn

(nl) Vermeersch, Valentin 1971 : De Walplaats, in : Brugsch Handelsblad, 12 augustus.
(nl) Ballegeer, Johan 1984 : Gids voor Oud Brugge, Antwerpen/Weesp, p. 114-115.
(nl) Van Aerschot-Van Haeverbeeck, Suzanne (red.); Gilté, Stefanie; Vanwalleghem, Aagje 2004 : Bouwen door de eeuwen heen. Inventaris van het cultuurbezit in België. Architectuur. Deel 18n b. Stad Brugge, Middeleeuwse stadsuitbreiding Zuid, p. 226-236, Turnhout.
(fr) Marlier, Pierre 1993 : La Walplein à Bruges au milieu du XIXe siècle, in : Jaarboek 1991-92, Brugge Stedelijke Musea, Brugge, p. 195-204.
(nl) Debrabandere, Frans 2013 : Brugse plaatsnamen, in : Brugge die Scone, september.

Ofbeeldiengn die ier by passn ku je vien in de categorie Walplein (Brugge) van Wikimedia Commons.