Weevrs'of

Dat artikel es geschreevn in 't Noordelik West-Vlams.

't Weevrs'of is e stroate in Brugge. 't Weevrs'of êt in- en uutgank an 't Zunnekemêers. In de toegangspôorte istr 'n êrdenkiengsploate angebrocht, die d' êrrinnerienge aan Leon De Meulemeester iproept. An den achterkant loptr e voetgangersweg, die toegang gift nor e seerje garaazjeboxen en uutmoendt in den Ôostmêers.

Geschiednisse

't Weevrs'of is êen van de vele "fortn" die in Brugge, in 't byzoendre in de 19ste êewe oentstoenn. Ip achtreliggnde persêeln, mê dikkers mor e hêel nowe verbiendingsweg mêt de stroate, wierdn seerjes uuzetjes, gebowd deur zogenoamde "uuzetjesmêkrs", die z' an de werkmenschn vereurdn.

In 't begun van de 19ste êewe stoendr ip die plekke e zjenievrestookery uutgeboat deur Louis Verstraete. Roend 1850 wierd 't e petattemeelfabrieke en wierdn dr 34 uuzetjes gebowd, woavan 16 in 't vroegre stookerygebow. In 1924 wierd 't beluuk angekocht deur de Burgerlikke Godsuuzn, loatr Kommiesje van Oopnboarn Oenderstand. In 1937 wierden d' uuzetjes verbowd en gemoderniezeerd, dankzy e legoat of testamentèère beschikkienge vanweege Leon De Meulemeester (1871 - 1933), een lid van de glyknoamige Brugsche browersfamielje.

Vo die ingeslootn uuzetjes beetre bereikboar te moakn, wierdn e poar doavan lanst de stroatkant ofgebrookn. Toe in 1870 krêegn d' uuzn e nuumroo lik de stroate-nuumroos van 't Zunnekemêers. Tonne gaf de gemêenteroad an 't beluuk de noame "Weevrs'of", iermee de noame bevestigende die de volksmoend dran a gegeevn. Weevrs'of kwam verzeekrs deurda in de 19ste êewe, oendre d' oarme menschn die in 't "fort" weundn, undre veele weevrs bevoenn, diedr ook tuus undre werk deejn.

In 1936-37 wierd boovn d' uuzn e weg angeleid die de verbiendienge makte tusschn 't Sint-Jans'ospietoal en de Minnewoatr-klienieke an de teegnwôordige Professor Dr. J. Sebrechtsstroate. Achtr 1980 wierd die verbiendiengsweg mindre gebruukt. In 1992 wierd y, mêt uutzoendrienge van 't schildrachtige viaduuk boovn 't Zunnekemêers, ofgebrookn. Begun van de joarn neegntig wierden d' uuzetjes van 't beluuk gemoderniezeerd en wierdn dr e poar in dezeifste styl bygebowd. 't gehêel krêeg 'n uutzicht da te verglykn is mê d' oede godsuuzn-beluukn.

E bitje voddr kykn

(nl) Schouteet Albert 1977 : De straatnamen van Brugge. Oorsprong en betekenis, Brugge, ISBN 9789062675036.
(nl) Michiels Guill. 1978 : Uit de wereld der Brugse mensen, Brugge.
(nl) Rau Jaak A. 1996 : De huisvesting van het proletariaat in het 19de-eeuwse Brugge: de Forten, in : Brugs Ommeland, blz. 1-152.
(nl) De Brabandere Frans 2013 : Brugse plaatsnamen, in : Brugge die Scone, september.
(nl) Van Den Abeele Andries 2013 : Het testament van een verloren zoon. Leon de Meulemeester junior, weldoener van het Brugse 'Wevershof' en van de Sint-Annakerk, in : Biekorf.