Yves Vanderhaeghe

Van Wikipedia
Dit artikel zou beter herschreevn zyn in 't Roeseloars.

Yves Vanderhaeghe (Roeseloare, 30 januoari 1970) was e foetbolliest en trainer. Sinds 4 oktober 2017 is hij hoofdcoach van AA Gent. Ze beste posiesje is ossan verdedignde middnvelder ewist, e plekke woa da zyn kwaliteitn ideoal vôorn woarn. En indeliks talent wos 'n nie, mor deur e masse te werkn en dervôorn te leevn, is 'n egliek êen van de belangrykste Belgische spelers van de latste 15 joar ekommn. Uutendelik is 'n 3 keirs Kampioen van België ekommn met Anderlecht.

Jeugd[bewerkn | brontekst bewerken]

Vanderhaeghe et in ze jeugd espeeld byn Club Roeseloare, tout at 'n in 1986 veruusde no Cercle Brugge. At 'n zeevntiene wos, is er by nem en ersntumor evoundn en wos 'n verre dôod. Deur cortisoonn is 'n derdeure erocht, mo 't peisde niemand dat 'n nog eisn proffoetbolliest gienke kommn. Achter dat 'n geneezn wos, is 'n were ekêerd no Club Roeseloare, woamei dat 'n 4 joar in derde klasse speelde.

Profcarrière[bewerkn | brontekst bewerken]

Vanderhaeghe is mo loate en echtn topfoetbolliest ekommn, want de twi joar derup (1992-1994) gienk 'n in twidde klasse gon speeln by Moeschroen. In 1994 kus 'n toune eindelik in êeste klasse gon speeln, byn Eendracht Aalst. Doar at 'n êentige goeie joarn en in 1997 gienk 'n were no Moeschroen, die oundertusschn in êeste zaat. E speelde doar indeliks goed en drie joar loater (achter dat 'n at 'n 29 wos in 1999 voun 'n êeste kêe Rôodn Duvel kwaam) kochte Anderlecht nem. 't Woarn vele twyfels over dienn transfer, mo ne kwaam ol zêre êen van de vaste weirdn, die verre olle matchn speelde (at 'n gin neuke adde). Ollêne in ze latste joar byn Anderlecht (2006-2007) zaat 'n mêer up 'n bank of etwot aars en in januoari zette 'n e krabbel ounder e countract byn Roeseloare. Deur e zwoare neuke an ze knie, et 'n byn Roeseloare nie vele kunn speeln en ne besliste van uut te schêen me foetbol.

Up 3 meie 2008 gienk 'n up Schiervelde en ofscheid krygn (tope me Koen De Vleeschauwer, die nor Oudenoarde gienk), mor e wos in zyn lochtienk an 't werkn en adde der nie up elet oe loate dat ol wos, woadeure dat 'n en bitje te loate kwaam en dat 'n dus ounchance adde en gin uldigienge krêeg.

Rôo Duvels[bewerkn | brontekst bewerken]

Up 30 meie van 1999 speelde 'n voun 'n êeste kêe me de Rôo Duvels, in Osaka teegn Peru (1-1). In de 48 interlands dat 'n espeeld et (33ste plekke in de geschiedenisse van 't Belgisch foetbol, tope met Anoul, Hanon en Erwin Vanderbergh), et 'n 2 goals emakt. E speelde up 't Europees Kampioenschap van 2000 (in België en Olland, deruut in d'êeste rouden) en 't Weireldkampioenschap van 2002 (in Japan en Zuud-Korea, twidde roude oald teegn Brazilië).