After All
After All is e thrash-metalgroep uut 't Brugsche die officieel bestoat sedert 1990. In 2008 en ze voun 'n êeste kêe meugn speeln up Graspop.
Geschiedenisse
[bewerkn | brontekst bewerken]De geschiedenisse van After All go were no 1987, toune an Dries Van Damme en Christophe Depree in Crap Society speeldn. Achter êentige veranderiengn in de line-up, an ze 't gedacht voun e nieuwe noame te zoeken en ze maktn der At Last van. E bitje loater kwaamn ze te weetn dat er nog e groep wos in de streke van Brugge die ezô noemde en ze veranderdn nunder noame were in 1990, nu in After All, wuk da 't ebleevn is toet nu.
Nunder êeste uptreedn me nunder nieuwe noame wos in De Kelke in Brugge in oktober van 1990 en oungeveer e joar doarachter begustn ze an nunder êeste ploate (wel e mini), die in de zomer van 1992 zoudt uutkommn en die 'n titel Dusk adde.
In 1994 won After All 'n Rudd Rock Rally en muchtn ze speeln up da festival voun e man of 5000. 't Wos oundermêer doadeure dan ze Kloot Per W lêerdn kenn, e keirel die nem bezig ielde met Metalopolis, e metalprogramma up Studio Brussel. Ezô kwaamn ze in contact me Donor Productions, die nunder êeste langspeelploate (Wonder uut 1995) verdêelde. Deur die ploate muchtn ze 't vôorprogramma doen van Anathema en The Gathering en muchtn ze vou 'n êeste kêe buutn België speeln, in Olland.
In 1997 brochtn ze e nieuwn CD uut, Transcendent, die oek in Zwitserland, Duutsland en Vrankryk verdêeld wos. Ezô muchtn ze 't vôorprogramma doen van Saxon en Voivod en bykan oek van Megadeth. Da gienk nie deure en in te plekke muchtn ze in 'n AB in Brussel in 't vôorprogramma van Apocalyptica speeln.
In 2000 kwam 't er e nieuwe CD uut, Dead Loss, woadeure dan ze oundermêer up Eurorock muchtn speeln, e zomerfestival woa dan der mêer of 20 000 man up ofkwaamn. In 2003 kwam nundern vierde ploate uut, Mercury Rising en ze muchtn da joar tourn met Anthrax, êen van de grotste en bekendste thrashmetalgroepn, en Overkill.
In 2005 kwam 't er vuufdn CD uut (die oek in e specioale vinylversche uutkwaam) die The Vermin Breed noemde en woavôorn dan ze no Zweedn egoan zyn voun de mix. Ze woarn econtacteerd deur Agent Steel voun e tour deur Europa (België, Olland, Duutsland, Zwitserland, Italië en Slovenië). Twi joar loater brochtn ze me This Violent Decline nundern zesdn uut en die ploate laag ook in Canada en Australië in de rekkn. Ze dein weer en Europeeschn tour (met Agent Steel en Vicious Rumors), ze speeldn oek in Spanje, Grieknland, Bulgarye, Roemenië, Servië en Ôostnryk (ol zyn ol die shows wel zounder After Alls vastn zanger Piet Focroul, mo me Peter Evrard, die wel tyd adde.
In 2008 muchtn ze uuteindelik up Graspop speeln, woa dan ze e goein show brochtn met de mêeste biendtekstn in 't West-Vlams.
Groepsleedn
[bewerkn | brontekst bewerken]- Piet Focroult - zang
- Dries Van Damme - gitaar
- Christophe Depree - gitaar
- Erwin Casier - bas
- Kevin Strubbe - drums
Discografie
[bewerkn | brontekst bewerken]- Wonder (1995)
- Transcendent (1998)
- Dead Loss (2000)
- Mercury Rising (2003)
- The Vermin Breed (2005)
- This Violent Decline (2006)
- Waves of Annihilation (2016)