Louis VI van Vrankryk
| 1081-1137 | ||||||
|---|---|---|---|---|---|---|
| ||||||
 |
||||||
|
||||||
|
Louis VI, den Dikkn genoemd (Frãns: le Gros) of de Vechter (Frãns: le Batailleur), van 't Huus Capet, (Parys, 1 december 1081 – Château de la Douye in Béthisy-Saint-Pierre, 1 ogustus 1137) was keunienk van de Frankn van 1108 tout 1137. Ip 3 ogustus 1108 wierd ie gekrôond in de kathedroale van Orléans. Je was bykan 30 joar keunienk en standvastig in conflict met Iengeland over Normandië.
Louis VI was de zeune van Philippe I van Vrankryk en Bertha van Holland. Ip 14 april 1129 liet ie zyn oudste zeune Philippe krôonn tout co-keunienk in Reims. Mo Philippe veroungelukte twi joar en zes moandn loater me zyn peird. Je stierf ip 13 oktober 1131. Louis liet ton zyn twidde zeune Louis VII krôonn tout co-keunienk ip 25 oktober 1131, ook in Reims.
Zyn tussnkomste in Vloandern
[bewerkn | brontekst bewerken]Den twiddn moarte 1127 hen de Erembalds de groaf van Vloandern Karel de Goein vermôord in de Sint-Donoaskerke ip de Burg in Brugge. Karel de Goein was styf geirn gezien by 't geweun volk en deur zyn ounverwachtn dôod en omdat 'n gin jounges haad en dus gin ipvolger, gerakte Vloandern in e serieuze crisis.
Algauwe woarn der verschillige kandidoatn die ansproake kostn moakn vor hem ip te volgn als groaf van Vloandern:
- Willem van Yper (klêenzeune van Robrecht de Fries)
- Dirk VI van Holland (achterklêenzeune van Geertrui van Holland, die getrouwd was mè Robrecht de Fries)
- Boudewyn IV van Henegouwn (achterklêenzeune van Richilde van Henegouwn, die getrouwd was mè Boudewyn VI van Vloandern
- Arnaud van Denemarkn (zeune van Ingertha, zuster van Karel de Goein)
- Diederik van den Elzas (klêenzeune langs moeders kant van Robrecht de Fries)
Mo Louis VI ha zyn eign kandidoat in gedachtn. Je profiteerde van de chaos en in de verwarrienge gebruuktegt ie zyn recht als lêenheere deur de Normandiër Willem Clito, e zeune van Robert Curthose, an te stelln. Azo kost ie van Vloandern e sterkn boundgenôot moakn teegn de keunienk van Iengeland, Henry Beauclerc.
Willem van Yper betwistte die keuze. Doarip trok Lodewyk VI met e gewoapnd leger noar Yper. D'Yperliengn lietn under binn langs de stadspôortn en ze kostn Willem van Yper vangn. Je wierd ipgeslootn in 't gevang van Rysel.
De 23stn moarte volgde Willem Clito Karel de Goein ip. Vo da Louis VI werekêerde no Vrankryk liet ie nog de môordenoars van Karel de Goein van den hoogste torre van de burcht smytn.
De Bruggeliengn verzettegn under teegn Clito deur zyn anti-Iengelsche polletiek. Economisch kwoamn Vloandern en Iengeland goed overêen, omdat de Vlamsche loaknindustrie Iengelsche wulle verwerkte.
Algouwe begostn z'overal in ipstand te kommn. In Rysel en Sint-Omoars wierdn ze zwoar gestraft. Moar o Clito ip weg was no Gent haan z'under doa voorbereid deur twi machtige hêern van Ryksvloandern, Daniel van Dendermonde en Ywan van Oalst, te benoemn. Ze voeldn under sterk, want de keunienk van Iengeland haad under beloofd van Vloandern militair te steunn.
Brugge en Gent wildn Diederik van den Elzas als under groaf, en ze vochtn verschillige veldsloagn uut. Ip 21 juni 1128 won Willem Clito de Slag by Axpoele teegn Diederik van den Elzas, die nog ip tyd kost vluchtn noar Oalst.
De regerienge van Willem Clito deurde moar e joar. Ip 27 juli 1128 ist 'n gesneuveld by 't beleg van Oalst. Achter 'n dôod van Willem Clito probeerde Willem van Yper were groaf van Vloandern te wordn, mo je verlôor van Diederik van den Elzas, die hem in 1133 uut Vloandern verbande en zyn bezittiengn ansloeg. Loater krêegt 'n zyn rechtn ip 't burggroafschap van Yper were.
Diederik van den Elzas volgde Willem Clito ip.
Huwelik en jounges
[bewerkn | brontekst bewerken]
Louis VI trouwde in 1115 met Adelaide van Savoie. Zhaan acht jounges:
- Philippe (1116 - † 1131), nie te verwarrn me zyn joungere broere me dezelfste noame.
- Louis VII (1120-1180), zyn ipvolger
- Henri (1121-1175), eirtsbisschop van Reims
- Hugues (ca. 1122), jounk gestorvn
- Robert I van Dreux (ca. 1123-1188)
- Peter (1126 - 1183),
- Constance (ca 1128-1176),
- Philippe (ca. 1132/1133-1161). Je wierd benoemd tout bisschop van Parys, mo je refuseerde den titel en je blêef eirtsdioakn.
Louis VI haad ook een dochter by Marie de Breuillet: Isabelle (ca. 1101/1104-ca.1175)
|
Ofbeeldiengn die ier by passn ku je vien in de categorie Louis VI of France van Wikimedia Commons. |