Mathilde van Iengeland

Mathilde van Iengeland, in 't Iengels: Empress Matilda of Empress Maude, (ca. 7 februoari 1102 - 10 september 1167), was de dochter van keunienk Hendrik I van Iengeland en Edith (Matilda) van Schotland, en e klêendochter van Willem de Veroveroare en Mathilda van Vloandern.

Ze trouwde in 1114 in Mainz met de Duutsche keizer Hendrik V, die in 1125 stierf. Met hem ha ze gin jounges.

Heur broere, William Adelin, den ênigste wettegen ipvolger van heur voader, was in 1120 verdrounkn binst de rampe van ’t Wit Schip ip ’t Kanoal tusschn Normandië en Iengeland. Doadeure wierd heur voader achter zyn dôod ipgevolgd deur de zeune van zyn zuster, Stefan van Blois.

Mo da wierd betwist deur Mathilde en ze begostn een burgeroorloge (1135–1154), de Anarchie genoemd. Uutendelik kwamt er in de zomer van 1153, met et Verdrag van Wallingford (of et Verdrag van Winchester), een akkôord. Stefan mocht de trôone houdn tout an zyn dôod ip vôorwoarde dat ie zoud ipgevolgd wordn deur de zeune van Mathilde.

Met heur twidde vint Godfried Plantagenet, de groaf van Anjou, ha ze drie jounges:

• Henry Curtmantle (1133–1189), die keunienk van Iengeland kwam als Hendrik II.
• Godfried, groaf van Nantes (1 juni 1134 Rouen- 26 juli 1158 Nantes), nie getrouwd
• Willem van Dieppe (1136–1164), nie getrouwd

Under oudste zeune Hendrik II volgde Stefan van Blois ip als êeste keunienk van Iengeland van 't Huus Plantagenet.

Ofbeeldiengn die ier by passn ku je vien in de categorie Empress Mathilda van Wikimedia Commons.