Sandro Botticelli

Van Wikipedia
Anbiddienge van 't Kind (Uffizi, Firenze), me reks Botticelli 's zelfportret. In 't middn geknield Cosimo de' Medici den Oudn me vanvôorn zyn twi zeuns Piero en Giovanni.
Fragment uut ‘t leevn van Mozes, fresco van de Sixtynsche kapelle

Alessandro di Mariano di Vanni Filipepi, beter bekend ols Sandro Botticelli (Firenze, round 1445 - Firenze, 17 meie 1510), was e kunstschilder uut d’Italioansche Vroegrenaissance.

Je was de zeune van de lêerlôoier Mariano di Vanni di Amadeo Filipepi en zyn vrouwe Smeralda.

Botticelli leefde juste achter de periode da de middelêeuws-christelikkn tyd begost t'evolueern no de mêer materieel g’inspireerde humanistischn tyd van de renaissance. Firenze was ton ounder ’t geslacht de' Medici ’t belangrykste kunstcenter van Europa.

Botticelli leefde temiddn van kunstenoars lik Masaccio, den architect Brunelleschi, den beeldhouwer Donatello, Leonardo da Vinci, Michelangelo... en d’er leefdeg’ ook e figeure die gin kunstenoare was mo toch e grôotn invloed ip hem had. ’t Was den dominicoan Savonarola die ip e fanatieke maniere prikte vo ‘t herstel van ’t godsdienstig leevn en teegn de misbruukn ip kerkelik en stoatkundig gebied.

D’r zyn drie schilderperiodes in Botticelli ‘s leevn: Den tyd van de Madonna ‘s (ounder invloed van Savonarola), den tyd van de portrettn en de periode van de mythologische taferêeln, w.o. zyn ‘Geboorte van Venus’, êen van de mêest gereproduceerde schilderyen ter weireld.

’t Feit da Botticelli ’t portret mocht moakn van Giuliano de' Medici en dat ’n de meurfresco’s in de Sixtynsche kapelle mocht schildern bewyst dat ’n styf g’apprecieerd was in zyn tyd. J’illustreerdeg ook de ‘Goddelikke Comedie’ van Dante in ipdracht van Lorenzo de' Medici. ’t Boek kwam uut in 1481 en ’t was êen van d’êeste productn van de boekdrukkunste.

En toch zyn zyn mêesterwerkn hounderdn joarn overschilderd gewist. ’t Is mor in den twiddn helft van de 19ste êeuwe dan Ingelsche kunstenoars hem herountdekt hen.

Botticelli wordt anzien ols êen van de fyngevoeligste en dichterlikste schilders van de renaissance, goed te zien in zyn ‘Primavera’ me pastelachtige tintn.

Je werkte styf lineair. Den tyd van Titiaan, die de vormn deur kleur en schoaduwe zou bepoaln, was nog verre weg. Die lynn valln styf ip in zyn fresco ’s van de Sixtynsche kapelle en surtout in de figeure van de jounge vrouwe uut ’t leevn van Mozes.

Geboorte van Venus
Primavera
Wikimedia Commons Mêer ofbeeldiengn die ier by passn ku je vien ip Sandro Botticelli ip Wikimedia Commons.