Meregem

Meregem Merville
Meregem in 't arroundissement Duunkerke
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Hoazebroek
Coördinoatn	50°38′NB 2°38′OL
Ippervlak	26.96 km²
Inweuners
Inweuners Bevolkiengsdichtheid	8993 (2010) 334 inw./km²
Andere
Burgemêester	Jacques Parent
Postcode	59660
Webadres	Site van Meregem

Meregem ofte Mergem (Frans: Merville) es e gemêente in Vrankryk in't Noorderdepartement. 't Ligt in Frans-Vloandern in't Leiedal. Deur't middn van de gemêente strôomt de Leie. Meregem grenst an de gemêentn Oud-Berkyn, Nieuw-Berkyn, Stegers, De Gorge, Lestrem, Calonne-sur-la-Lys, Sint-Floris, Oaverskerke en Moerbeke. In de gemêente liggn ôok nog de gehuchtjes Le Sart en Caudescure.

Geschiedenisse

An't ende van de zeevnde êeuwe stichtte Maurand, den ertog van Dowoai, e klôoster an de bôordn van de Leie by en plekke genoamd Bruël en liet in 690 de direksje dervan oovr an Amatus van Sion, die ip da moment by em in balliengschap wos. Achter 'n tydje begoest er round 't klôoster volk te weun'n en ezo ontstound e dorptje die in't middelêeuws Latyn in 697 gattesteerd es lyk Maurontivilla - Broislum. In 1076 es 't dorp vermeld lyk Menrivilla in nen diplôme van keunienk Filips I van Vrankryk, die de rechtn en de goedern dervan consacreerde an de Collegioale Sent-Amatuskerke van Dowoai. Byst dien tyd wos Meregem ôok en ounderdêel van 't Groafschap Vloandern. In 1431 kreeg et toenmoalige Meerghem van de Bourgoundischn ertog Filips den Goein 't privilege ip't fabriceern van loakn en in 1451 teeknde ie em ôok de "Ghisle de Menreville" die 't officiël stadscharter wos van Meregem. In 1678 wierd 't stadje me't Verdrag van Neymeegn were by Vrankryk gevoegd. Byst die gehille periode es Meregem in oorloogn teffrente kêern me de ground gelyk gemakt.

Byst den Êestn Weireldoorloge wierd Meregem were hillegans platgesmeetn, ol de gebouwn die je der nu kut zien in neo-Vlamsche architecture es ebouwd gewist byst de reconstruuksje van 't stadje in de joarn 1920. In 1936 wierd 't vliegveld van Meregem ipgezet deur de Fransche luchtmacht. In't begun van den Twiddn Weireldôorloge wierd 't vliegpling nog gebruukt deur d'Iengelsche Royal Air Force mo me de verooverienge deur de Deutschers wierd ze gebruukt deur de Luftwaffe die 't vliegpling uutgebreyd et. Deur 't vliegpling wos Meregem wel e strategische plekke vo were in te neemn vo de G'allieerdn en ip 12 juni 1944 wierd 't stadje serieus gebombardeerd deur Amerikoansche vliegers.

Bezienswoardigeedn

• 't Staduus in neo-Vlamsche styl die ernieuw g'inaugureerd es in 1929.
• De Sent-Pieterskerke
• Ip de gemêentelyke begroafplekke van Meregem ester e perk me mêer of 1.200 Britse gesneuvelde uut den Êestn Weireldoorloge. Ansluutend derby ligt Merville Communal Cemetery Extension, en uutbreydienge me nog ne kêe mêer of 1.000 dôo.

't Staduus van Merville

Ofbeeldiengn die ier by passn ku je vien in de categorie Merville (Nord) van Wikimedia Commons.