Belle

Belle Bailleul

Belle in 't arroundissement Duunkerke
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Belle
Coördinoatn	50°44′NB 2°44′OL
Ippervlak	43,42 km²
Inweuners
Inweuners Bevolkiengsdichtheid	14.467 (2016) 333 inw./km²
Andere
Burgemêester	Antony Gautier 2020-2026
Postcode	59270
Webadres	Belle

Belle (/balə/) (Frans : Bailleul) es e gemêente in Vrankryk in 't Noorderdepartement. 't Ligt in Fransch-Vlaenderen, mêer bepoald in de Franschn Westoek, teegn De Schreeve. Belle grenst an de West-vlamsch gemêente Vlaenderen Bergen (mêer bepoald an Westouter, Loker, Dranouter en Nieuwkerke) en an de Fransche gemêentn Niepkerke, Steenwerk, Zoetestede, Oud-Berkyn, Merris, Metern en Sint-Janskapelle.

Belle ligt in 't Frans-Vlamsche Houtland, nie verre van de Leiedaele, an de voet van de bergen van de Fransche Westoek, lyk de Zwortnberg en de Katsberg. By de gemêente ôorn ôok nog de gehuchtn Outerstene, 't Stêentje, De Krebbe en Le Nouveau Monde. Hil o d'ôostkantn van Belle teegn De Schreeve ligt et grensgehuchtje De Seule.

't Weunn e grôote 14.000 mienschn en 't uutzicht is nog ossan styf Vlams, oundermêer om dan der achtern 'n Êestn Weireldôorlooge (verre olles wos plateschootn) uuzn ezet zyn lyk in Brugge. Deur Belle lôopt d'A25-ottostroade tusschn Rysel en Duunkerke, die en ounderdêel es van d'E42. In Belle ligt er ôok e stoasje an d'yzerboane tusschn Rysel en Haezebroek. Ôok lôopt er en ôogesneleydlynne vo TGV's tusschn Rysel en Kales deur 't groundgebied van de gemêente, mo die stopp'n iere vaneig'n nie.

Beziensweirdigeedn

't Stadhuus van Belle mè 't belfort, da ôorsprounkelyk wierd ipgericht in de twoalfde êeuwe mo deur d'n tyd verschilligte kêern es g'abimeerd deur brand of ôorlooge. Ôok in d'n Êestn Weireldoorlooge es't hillegansn platgesmeetn. Derachter es 't erbouwd en sedert 1922 es 't erkend lyk istorisch monument. 't Belfort es ôok, tôope mè nen ôop and're belfortn in Vlaenderen en Frans-Vlaenderen, erkend lik weirelderfgoed deur den Unesco.
De Sint-Vaastkerke
De Sent-Amandskerke
't Ôorloogsmonument, gebouwd ip de plekke van de vroegere Sint-Amandskerke mè stêen'n van de bist d'n oorlooge platgesmeetn kerkn en belfort.
't Iengels ôorloogsmonument uut 1921
't Présidial, de vroegern rechtbank van de baljuw, es gebouwd in 1776 en es êen van de êenigste gebouwen die nie zyn platgesmeet bist d'n ôorlooge.
't Muuzee Benoît de Puydt mè Vlamsche en Nederlandse kunst
't Huus van't Nederlands of Maison du Néerlandais (MNL), 't regionoal centrum vo 't Nederlands in Nôord-Vrankryk
In de gemêente zyn der verschilligte soldoatekerkoovn:
- 't Bailleul Communal Cemetery Extension, mè mêer of 4500 groavn
- 't Outtersteene Communal Cemetery Extension, in 't gehucht Outerstene, mè 1465 gesneuveld'n
- Ip de gemêentelyke begroafplekke van Belle liggen der mêer of 700 Fransche en Iengelsche gesneuveld'n