Moerbeke (Vrankryk)

Moerbeke Morbecque

Moerbeke in 't arroundissement Duunkerke
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Oazebroeke
Coördinoatn	50°41′NB 2°31′OL
Ippervlak	44.34 km²
Inweuners
Inweuners Bevolkiengsdichtheid	2658 (2010) 60 inw./km²
Andere
Burgemêester	Max Herbaux
Postcode	59190
Webadres	Officiëln site van Moerbeke

Moerbeke (Frans: Morbecque) es e gemêente in Vrankryk in't Noorderdepartement. 't Ligt in Frans-Vloandern ip't schee'n van 't Outland en 't Leiedal. 't Grenst an de gemêentn Oazebroeke, Oud-Berkyn, Meregem, Oaverskerke, Tien'n, Steenbeke, Bloaringem, Zerkel en Woals-Kapel.

't Grôotste gedêelte van 't groundgebied es in beslag genoomn deur't Niepebus en doamee es Moerbeke de mêest busryke gemêente van't departement me 2300 ektoarn an bus. In de gemêente liggn ôok nog en pôote gehuchtjes lyk Le Grand Hasard, Le Pré-à-Vin, Le Parc en 't dorpje De Walle (in't Frans: La Motte-au-Bois), da temiddn 't Niepebus ligt.

Geschiedenisse

Moerbeke ieng langn tyd af van de heern van Sint-Omoars die loatr heern van Moerbeke zod'n kommn. In tydde stoundn der twêe kastêeln ip't groundgebied van't huudige Moerbeke: 't kastêel van De Walle van de groavn van Vloandern en 't kastêel van Moerbeke zelve van de heern van Moerbeke. 't Latstgenoemde wierd in 1328 belegerd deur keunienk Philippe IV van Vrankryk in de contexte van den Boerenipstand van Kust-Vloandern. Achter acht doagn van beleegerienge, goavn ze ulder oovr en wierd et kastêel ountmanteld. Ierby wierdn heer Willem van Moerbeke en hil zyn familje vermôord behalve zyn latste zeune Denis die gespoard beleef. Die Denis van Moerbeke zod em loater, in 1356, doen ipvolln in de contexte van den Ounderdjoarigen ôorlog in dienste van de tonmoalign Iengelschn trôonopvolger Eduard van Woodstock (bygenoamd "De Zworte Prinse") woar Denis meedeed an diens plundertochte deur Vrankryk en uutendelyk in de slag by Poitiers teegn de Franschn ulder keunienk Jan II van Vrankryk koeste gevangn pakkn.

In 1619 wierd Moerbeke ipgewoardeerd tout groafschap en derachter in 1629 tout e markgroafschap van de Spoansche Nederlandn totda't gebied tegoare me d'oovergoave van Sint-Omoars in 1677 overgienk na Vrankryk. Ip't ende van de achttiende êeuwe wierd De Walle officiël by de gemêente Moerbeke gevoegd.

In't Bois des Huit-Rues an de grenze me Woals-Kapel stoan der oovrbluufseln van e Duutsche militaire boazisse vo V1-raketn te lanceern, die wierd gebouwd vanaf 't joar 1943. Neevnst wa beschuttiengn zyn der ôok nog twêe rampn te ziene die gericht stoan richtienge Ingeland vo V1's of te schietn. De boazisse es wel nôois in gebruuk genoomn.

Bezienswoardigeedn

De Sint-Firminkerke in Moerbeke zelve en de Sint-Firmin-fonteyne woavan 't woater goe zo zyn teegn krampen en reumatiek
't Kastêel en de Sint-Thomas van Canterburykerke van De Walle
Et Morbecque British Cemetery en Le Grand Hasard Military Cemetery, twêe Britse kerkoovn me gesneuveldn uut den Êestn Weireldoorloge