Arnulf I van Vloandern

Van Wikipedia
Arnulf I van Vloandern
889 - 965
Groaf van Vloandern
Periode918-965
me Boudewyn III :
(958-962)
VôorgangerBoudewyn II
IpvolgerArnulf II van Vloandern
Groaf van Boulogne
Periode933 - 964
VôorgangerAdalolf
IpvolgerArnulf II van Boulogne
VoaderBoudewyn II
MoederÆlfthryth van Wessex
De môord ip Willem I van Normandië in ipdracht van Arnulf I (Grandes Chroniques de France deur Jean Fouquet, 1455-1460)

Arnulf I, bygenoamd de Grôotn (889 - 27 moarte 965), was de derde groaf van Vloandern. Je was den oudste zeune van groaf Boudewyn II van Vloandern en d’Iengelsche Ælfthryth van Wessex, dochter van Alfred de Grôotn. J’is genoemd achter zyn verre vôorouder Arnulf van Metz, vo dudelyk te moakn dat ’n ofstamde van de Karoliengers.

Zyn voader had hem binst zyn regerienge styf kunn emancipeern van de Fransche krône, in teegnstellienge me zyn grotvoader Boudewyn I, die nog dudelyk minder zelfstandig was. Achter d’invoazjes van de Vikings ha Boudewyn II hem kunn mêester moakn van de verloatn gouwn in de nôordelyke Scheldestreke.

Achter zyn dôod in 918 wierd zyn groafschap verdêeld ounder zyn twi zeuns. Arnulf den oudstn erfde ‘t grotste (nôordelyk) stik, ’t eigentlyke Vloandern. Zyn joungere broere Adalolf krêegt de streke van Terwoan en Bonen (Boulogne) en de ryke Sint- Bertynsabdye.

Uutbreidienge van 't Groafschap Vloandern[bewerkn | brontekst bewerken]

Achter den dôod van zyn broere in 933 krêeg Arnulf nog zyn dêel d’r by en je kost zyn groafschap nog no ’t zuudn uutbreidn met Artesië, Ponthieu, Amiens en Oosterbant (Ostrevent), tout over de riviere de Somme.

Vo zyn groafschap te kunn uutbreidn had ‘n kunn profiteern van de conflictn vo de macht in West-Francië tusschn Karel de Simpeln en Robert I.

In 922 han bepoalde eedeln w.o. Herbert II van Vermandois gerevolteerd teegn Karel de Simpeln en z’han Robert I, broere van Odo I gekrôond tout keunienk. De 15ste juni 923, in de Slag van Soissons, is Robert I gesneuveld, mo Karel de Simpeln wierd gevangn gezet en ze verkoozn Rudolf van Bourgondië tout nieuwe keunienk van West-Francië.

Arnulf had êest de Karolienger Karel de Simpeln gesteund in de slag van Soissons en loater Rudolf I teegn de Deensche Viking Rollo, de stamvoader van d’hertoogn van Normandië.

O Siegfried den Deen en zyn Vikings under in 928 mêester miekn van ’t loatere Guînes, stopte Arnulf zyn verzet. Je gaf zyn dochter en den titel van groaf van Guînes an Siegfried, die vazal van de groaf van Vloandern kwam.

In 936 wierd keunienk Rudolf I ipgevolgd deur Lodewyk IV van Overzêe. ’t Was de zeune van Karel de Simpeln en dus wast er were e Karolienger an de macht. Moar Arnulf kwam in conflict met hem en je most Amiens ofstoan.

In 939 gerakte Arnulf in oorloge me Willem I van Normandië. De 17stn december 942 wierd er e vergoarienge g’organiseerd vo te klappn over vrede. Ze kwoamn oungewoapnd tegoare in Picquigny ip ’n eilandje in de Somme. Moar achter dat iederêen weg was liet Arnulf Willem were roepn. Willem die niks ip haad en were kwam wierd vermôord.

Vrouwe en jounges[bewerkn | brontekst bewerken]

In 934 is Arnulf getrouwd met Adele van Vermandois, dochter van Herbert II van Vermandois. Under jounges woarn:

  • Elftrude, round 932 geboorn, in 964 getrouwd me Siegfried den Deen, groaf van Guînes
  • Hildegarde van Vloandern (934-990), getrouwd round 943 me Dirk II van Holland, groaf van West-Friesland en van 965 groaf van Gent
  • Egbert (937-953)
  • Luitgarde van Vloandern (938-964), getrouwd in 950 me Wichman II van Hamaland
  • Boudewyn III (940-962), groaf van Vloandern

J’had ook nog ’n ounwettige dochter, Hildegard.

Zyn loater leevn[bewerkn | brontekst bewerken]

Ounder zyn voader en grotvoader Boudewyn I en II haan z'ip den Burg in Brugge e versterktn burcht teegn de Vikings gebouwd. An de burcht wierd er ook e Pre-Romoansche kapelle gebouwd.

In 944 liet Arnulf de kapelle verbouwn tout e Karolingische kerke, de Sint-Donaaskerke. Je liet de kerke bouwn no ’t model van de Paltskapelle van Karel de Grôotn in Aakn. ’t Was e symbool van groafelyke macht.

J’het ook de kerke van Tourhout gesticht en de kapelle van St-Jan in Gent. In 945 gaft ’n ipdracht an Gerard van Brogne vo de klôosters in ’t groafschap t’hervormn. Je begost me de twi Gentse abdyen Sint-Pieters en Sint-Baafs en loater ook de Sint- Bertynsabdye, Sint-Omer en Sint Amand.

Round 960 het Arnulf in de Sint- Donaaskerke van Brugge e seculier kapittel gesticht met e college van prôost, deekn en 12 kanunnikn.

Arnulf miek zyn zeune Boudewyn III co-besteurder in 958, mo Boudewyn stierf ounverwachts in 962 an de pokkn of de moazels.

De zeuns van Arnulfs broere Adalolf kwoamn in ipstand en die crisis verplichtte Arnulf van e pact te sluutn me de nieuwe keunienk van West-Francië Lotharius. Lotharius zoudt achter Arnulfs dôod, zo lange dat Arnulfs ipvolger Arnulf II nog minderjoarig was, ’t zuudn van ‘t groafschap bezettn, vo nog meugelyke ipstandn t’ounderdrukkn, en Arnulf most Artesië ipzeggn.

Achter zyn dôod wierd 'n in Vloandern ipgevolgd deur zyn klêenzeune Arnulf II van Vloandern en in Boulogne deur Arnulf II van Boulogne, de zeune van zyn broere Adalolf.