Boudewyn IV van Vloandern

Boudewyn IV, bygenoamd met den Board (980 - 30 meie 1035), was groaf van Vloandern van 988 tout an zyn dôod.

Je was de zeune van Arnulf II en van Rozala-Suzanna van Ivrea, de dochter van Berengarius II, keunink van Italië.

O Boudewyn IV zyn voader ipvolgde wast ’n nog minderjoarig en kwamt 'n ounder de voogdye van zyn moeder.

't Was nie goed gesteld me 't groafschap Vloandern. Ol achter Arnulf I ’s dôod ha zyn broere Adalolf 's ounwettige zeune, Boudewyn (Baldzo), hem ounrechtmoatig mêester gemakt van ’t zudelik stik van de Kortrykgouwe, en achter zyn dôod kwam ’t in handn van Eilbodo, slotvoogd van Kortryk.

’t Nôordelik stik van de gouwe was tegoare gevoegd me ’t groafschap Gent en ’t Land van Woas, woavan da Dirk, de groaf van West-Friesland, hem in 964 mêester ha gemakt.

Boulogne was nor Arnulf II van Boulogne gegoan en de streke van Guînes no Deensche Vikings.

Vo zyn gezag were te winn vroeg Boudewyn steun an d’inweuners van Hoarelbeke, die ossan trouw gebleevn woarn an hunder groaf en doadeure gedeurig gepest wierdn deur de Kortrykzoann. On z’hoordn da Boudewyn ip weg was vo ’t gebied were ounder zyn gezag te krygn, vieln z'Hoarelbeke binn en stoakn ’t stadje in brande. Da was nie slim want nu krêegn ze de bevolkienge van ol d’andere omliggende dorpn teegn hunder en azo kost de groaf zounder vele moeite zyn gezag were herstelln.

Ounder de Capetiengers

Vrankryk round 987

Keunink Lotharius was in 986 gestorvn en je wierd ipgevolgd deur zyn zeune Lodewyk V, die kort doarip in 987 ook stierf. Je was de latstn keunink van de Karolingische dynastie in West-Francië. Je wierd ipgevolgd deur Hugo Capet, de zeune van hertog Hugo den Grôotn. Doamee wierd de periode van de Capetiengers ingezet en was ter gin sproake mi van West-Francië, mo van Vrankryk.

Achter da Boudewyns moeder Rozala-Suzanna weeuwe gewordn was, arrangeerde Hugo Capet 't huwelik met heur en zyn zeune, de loatern Robert II. Ze was 'n interessante partye omda ze Montreuil-sur-Mer en Ponthieu mee brocht, mo ze was ol mêer of viftig joar oud. Robert II trouwde teegn zyn gouste met heur en ze zyn loater geschid.

Reorganisoatië

Achter die moeilikke begunperiode van zyn regerienge krêeg Boudewyn mêer en mêer macht deur groundige hervormiengn. Round 993-994 verdêeldegt ie zyn groafschap in drie burggroafschappn, ieder round e groafelikkn burcht. De burggroave krêegt de leidienge over de besteurlikke, de rechterlikke en de militaire organisoatië en was platsvervanger van de groaf. De drie burggroafschappn woarn:

• Brugge.
• Doornik me Kortryk en Sint-Omaars
• Gent me ’t Land van Woas

Uutbreidienge van 't Groafschap

Nu dat olles intern gestabiliseerd was begost Boudewyn te zoekn vo zyn macht buutn ’t groafschap uut te breidn. Zyn vôorgangers Boudewyn II en Arnulf I han ’t groafschap zuudwoarts uutgebreid tusschn 879 en 965, mo nu wast er vele veranderd. Deur d’ountwikkelienge van de Normandische macht en deur de Fransche monarchie die ossan mo sterker kwam, kost Boudewyn nie mi verder no ’t zuudn. Doarom gingt ’n nu vo gebiedn, ten ôostn van de Schelde, van ’t Duuts Hillig Rôoms Ryk. ’t Was nie gemakkelik want keizer Otto II had ’n ende geleen, round 980, drie sterke burchtn langs de Schelde loatn bouwn en de markgroafschappn Antwerpn, Ename en Valenciennes ipgericht.

In 1006 pakteg't ie Valenciennes in, mo je kost ’t uuteindelik nie hoaln teegn de Duutsers, die gesteund woarn deur Fransche en Normandische troepn.

Den 22stn oktober 1011 krêegt ’n ton toch ’t Groafschap Valenciennes en de streke van Zêeland in lêen. Da was 't begun van Ryksvloandern (de gebiedn in lêen van ’t Ryk) tegenover Krôonvloandern (de gebiedn in lêen van Frankryk). In 1033 stak Boudewyn de Schelde over en veroverde ’t markgroafschap Ename.

Vrouwn en jounges

Êeste vrouwe: Ogiva van Luxemburg (in 1012), dochter van Frederik van Luxemburg. Z’han twi jounges:

• Boudewyn V van Vloandern
• Ermengarde, getrouwd met Adalbert, groaf van Gent

Twidde vrouwe: Eleonora van Normandië (in 1031), dochter van hertog Richard II van Normandië en Judith van Bretagne. Z’han twi dochters:

• Judith van Beiern, getrouwd mè Tostig Godwinsson, groaf van Northumberland, en mè Welf IV, hertog van Beiern
• dochter (noame ounbekend), getrouwd mè Reinier van Leuven, zeune van Lambert I van Leuven

Boudewyn IV stierf in 1035 en j’is begroavn in de St-Pietersabdye van Gent. Zyn zeune Boudewyn V volgdeg hem ip.