Boso van Provence

Boso van Provence of Boso van Vienne, (844 - 11 januoari 887), van de familie van de Bosonidn, was e zeune van groaf Bivinus van Vienne en e broere van Richard, den êestn hertog van Bourgondië. Zyn zuster Richildis was de twidde vrouwe van Karel de Kletsn.

In 875, achter den dôod van keizer Lodewyk II, die ook keunienk van Italië en Provence was, volgde Karel de Kletsn hem ip. Boso en zyn broere Richard giengn mee met hem noar Italië vo zyn keizerskrônienge. Karel benoemde Boso doar in februoari 876 in Pavia toet hertog en oenderkeunienk van Italië en hertog van Provence.

Lodewyk den Hakkeloare volgde in 877 zyn voader Karel de Kletsn ip, moar achter zyn dood wildn d’edeln van Provence zyn twi zeuns Lodewyk III en Karloman nie anveirdn als keunienk van Provence en ze koozn Boso in de plekke. Zyn keunienkryk Neder-Bourgondië (of Cisjuranië) wierd gesticht mè Vienne als hoofdstad. Boso was keunienk van 879 toet 887.

Boso was in 876 getrouwd met Ermengarde, dochter van keizer Lodewyk II, en doamee haad 'n zyn recht ip ipvolgienge nog versterkt.

Under joenges:

• Willa, getrouwd mè Rudolf I van Bourgondië
• Engelberga van Provence, getrouwd mè Willem I van Aquitanië
• Irmgard, getrouwd mè Manasses I van Chalon
• Lodewyk III, zyn ipvolger en ook keizer van et Hillig Rooms Ryk

De Karoliengers Lodewyk III en Karloman van West-Francië, en Karel den Dikkn en Lodewyk III van Oost-Francië vormdn e froent teegn hem en ze plunderdn Vienne.

Achter zyn dôod in 887 volgde zyn zeune Lodewyk III den Blendn hem ip.

Et keunienkryk van Boso in ’t geel, van Lodewyk III in 't purper, van Karloman in 't blauw, van Lodewyk de Joungn in 't groen, en van Karel den Dikkn in 't rôod