Karel den Kletsn

Van Wikipedia
Ga naar: Begunplekkn, zoeken
Karel de Kletsn
823- 877
KarlII monks.jpg
Armoiries Saint-Empire monocéphale.png
Keizer van et HRR
Periode 875-877
Vôorganger Lodewyk II
Ipvolger Karel den Dikkn
Autograf, Karl den store, Nordisk familjebok.png
Keunienk v. West-Francië
Periode 843-877
Vôorganger Lodewyk de Vroomn
Ipvolger Lodewyk den Hakkeloare
Armoiries Provence.png
Keunienk van Provence
Periode 875-877
Vôorganger Lodewyk II
Ipvolger Lodewyk den Hakkeloare
Corona ferrea.png
Keunienk van Italië
Periode 875-877
Vôorganger Lodewyk II
Ipvolger Karloman van Beiern
Blason de l'Aquitaine et de la Guyenne.svg
Keunienk van Aquitanië
Periode 848-855
Vôorganger Pepeyn II van Aquitanië
Ipvolger Karel et Kiend
Voader Lodewyk de Vroomn
Moeder Judith van Beiern

Karel II, bygenoamd de Kletsn, van 't Huus van de Karoliengers (Frankfurt am Main, 13 juni 823 - Avrieux (Savoye), 6 oktober 877) was keunienk van West-Francië achter ’t Verdrag van Verdun in 843, en van 875 tout an z’n dôod keizer van 't Hillig Rôoms Ryk.

Zyn leevn[bewerkn | brontekst bewerken]

Karel de Kletsn was de joungste zeune van keizer Lodewyk de Vroomn en z’n twidde vrouwe Judith van Beiern. J'is geboorn in 823 en zyn voader had ton ol drie grôte zeuns mè zyn êeste vrouwe: Lotharius I, Lodewyk den Duuts en Pepeyn I van Aquitanië.

Deur zyn geboorte kwam zyn voader in grôte probleemn, deurdat ie zyn ipvolgienge ol geregeld had in 817 mè de Ordinatio Imperii. Karel zyn moeder wilde nu dat heur zeuntje ook zyn dêel krêeg. Da was ’t begun van enorme gevechtn tusschn de broers en under voader.

En da woarn nie d’ênigste probleemn, want van 830 krêegn z’enorm vele last van de Vikings, die de gebiedn geregeld binn vieln.

In 838 stierf Pepeyn, twi joar vo zyn voader, en dus wast er 'n erfgenoam minder. De Ordinatio Imperii wierd nie mer anveird, en in 839 kwoamn z’akkoord met e nieuwe erfregelienge: 't Akkoord van Worms.

Achter den dôod van Lodewyk de Vroomn in 840, eiste Lotharius toch were d’invoerienge van de Ordinatio Imperii. D’andere woarn nie akkôord en Lotharius begost 'n oorloge teegn z’n broers, mo je verloor in 841 in de Slag by Fontenoy.

In 842 slootn Karel en Lodewyk den Duuts den Eed van Straatsburg teegn Lotharius, woarin dan ze beloofdn van makoar te bluuvn steunn.

Verdrag van Verdun[bewerkn | brontekst bewerken]

In 843 kwamt er e compromis met 't Verdrag van Verdun en wierd et Ryk in drie stikkn verdêeld:

In 855 verdêelde Lotharius I zyn Middnryk by 't verdrag van Prüm ounder zyn drie zeuns:

  • Lodewyk II, den oudstn, krêeg Nôord-Italië met de keizerskrône
  • Lotharius II krêeg et nôordelik dêel van ’t middnstik, da regnum Hlotharii genoemd wierd (Lotharingen).
  • Karel van Provence krêeg et zudelik dêel van 't middnstik: Bourgondië en Provence

Z’haan gin wettige zeuns.

In 860 probeerde Karel de Kletsn de bezittiengn van Karel van Provence te krygn, mo dat is nie gelukt. O Karel van Provence stierf in 863 giengn zyn gebiedn no zyn twi broers, keizer Lodewyk II en Lotharius II.

In 869 stierf Lotharius II en Karel de Kletsn viel Lotharingen binn vo zyn erfdêel ip t’eisn. Achter e joar kwamt er eindelik ’n ende an de gevechtn en in 870 wierd et verdrag van Meerssen getêeknd, woaby da Karel de Kletsn en Lodewyk den Duuts Lotharius zyn bezittiengn ounder makoar verdêeldn.

O keizer Lodewyk II ook stierf in 875, vertrok Karel de Kletsn no Rome en liet hem ip 25 december 875 deur paus Johannes VIII tout Rôoms keizer kroonn.

In 876 stierf Lodewyk den Duuts. Karel de Kletsn wilde nu nie ollêne Italië, mor ook nog Lodewyk zyn ôostelik stik van Lotharingen. Je viel Oost-Francië binn met e grôot leger, mo den 8stn oktober 876 ist ie versleegn gewist deur et klinder leger van Lodewyk den Duuts zyn zeune, Lodewyk de Joungn, in de Slag van Andernach. Je kost zyn oudn drôom, et Karolingisch Ryk herstelln, nu wel ipgeevn.

Vrouwn en jounges[bewerkn | brontekst bewerken]

Karel de Kletsn trouwde twi kès: Den 13stn december 842 in Quierzy met Ermentrudis, dochter van Groaf Odo van Orléans. Ze stierf in 869. By Ermentrudis haad ie vuuf dochters en vier zeuns, woavan dan der twêe hem overleefd hen:

  • Judith van West-Francië (844–870), die in de lente van 862 uut Senslis ountvoerd wierd deur Boudewyn I van Vloandern. Den dertienstn december 863 zyn ze getrouwd.
  • Lodewyk den Hakkeloare (846–879), die hem ipvolgde
  • Karel et Kiend (ca. 847/848-866)
  • Lotharius (848–865), monnik in 861
  • Carloman den Blendn (849–876). Zyn voader liet zyn oogn uutstekkn
  • Rothrudis (852–912), nunne
  • Ermentrudis (854–877), nunne
  • Hildegardis (856, jounk gestorvn)
  • Gisela (857–874)

Den 12stn oktober 869 mè Richilde van Provence. Ze was de nichte van keuniginne Theutberga, vrouwe van Lotharius II. Under jounges:

  • Rothildis (871–929)
  • Drogo (872–873)
  • Peppeyn (873–874)
  • Zeune geboorn en gestorvn in 875
  • Karel (876–877)