Boreoale busschn van Sakhalien

Van Wikipedia
Naar navigatie springen Jump to search
Dat artikel es oorsprounkelik geschreevn in 't Noordelik West-Vlams.

Liggienge van Sakhalien.
Liggienge van de boreoale busschn in de weirld.

De boreoale busschn van Sakhalien, geleegn in nôordlik Europa, zyn 'n ekostreeke uut d' ekozôone Palaearctis vôgnst de Weirld Nateur-Stichtienge (WWF) [1][2][3]. Ze maakn dêel uut van 't bioom de boreoale busschn of de tajga. D' ippervlakte van d' ekostreeke besloa 6 863 468 êktoarn [4].

Beschryvienge[bewerkn | brontekst bewerken]

Die ekostreeke bezet bykans hêel 't eiland Sakhalien mêt uutzoendrienge van e klêen stiksje loofbus in 't uuterste zuudn. De grenzn drvan kommn oovrêen mê de sentroale en zuudlikke tajga in de Sakhalien-Koerieln Provinsje ip de koarte van de busschn van Kurnaev in de Sovjet-Unie [5]. Sakhalien schidt de Zêe van Okhotsk van de Zêe van Japan in 't Verre Ôostn van Rusland

Plantn-weirld[bewerkn | brontekst bewerken]

Spôorweg deur de busschn van Sakhalien.

Hêel 't eiland is bedekt mê dichte busschn, mêesta koniefeern. Jezo-sparre (Picea jezoensis), Sakhalien-denne (Abies sachalinensis) en Dahoeriesche lorke (Larix gmelinii) zyn de belangrykste boomsôortn. De lorkn gruujn goed in de moerassige groendn in 't nôordn, binst dat Jezo-sparre en Sakhalien-denne de berg-êlliengn van 't Westlik Gebergte bedekkn. Oogr in de bergn wordn vôgnde sôortn gevoenn : Siebeeriesche dwergpyne (Pinus pumila), Kurielsche bamboe (Sasa kurilensis). Berkn, zowêl Siebeeriesche ruuwe berke (Betula platyphylla) en Erman-berke (B. ermanii), popliern, iepn, veuglkêrse (Prunus padus), Japansche venynboom (Taxus cuspidata) en verschillnde wilgesôortn zyn gemiengld mê de koniefeern. In den oendrgruuj van de busschn stoatr veele kruupbroame (Rubus chamaemorus), veenbesse-sôortn (Vaccinium subg. Oxycoccus), kroajheide (Empetrum nigrum), rôo busbesse (Vaccinium vitis-idaea), Euroaziesche rôovliere (Sambucus racemosa), wilde frambôoze (Rubus idaeus) en Spiraea.

Bêestn-weirld[bewerkn | brontekst bewerken]

Buslandschap in Sakhalien.
Ip de vôorgroend e slyk-vuulkoane.
Ip de vôorgroend 'n achtrgeloatn vrêcht stêenkooln.

In 't nôordn wordn bruune beir (Ursus arctos), vos (Vulpes vulpes), karieboe (Rangifer tarandus) en soablemartre (Martes zibellina), en oovroal istr muuskuus-êrte (Moschus spp.), oaze, êekôorn, ratte en muus. De veugl-weirld is dedeezn van ôostlik Siebeerje, mo dr zyn ook sommigte broedveugls die endeemiesch zyn of bykans endeemiesch, lik de bedreigde geplekte groenpôotruutre (Tringa guttifer) en de Japansche fieties (Phylloscopus borealoides). Blakiston-visuul (Bubo blakistoni), Oaziesche marbre-oalke (Brachyramphus perdix) en spitsvlerke-oene (Falcipennis falcipennis kommn veel vôorn, en vienn allemalle beschuttienge in de grôote koniefeern. Ook de mandaryn-oande (Aix galericulata) nestlt in die busschn. In de rieviern plantn drundre veele zoalmsôortn vôort, lik rôoze zoalm (Oncorhynchus gorbuscha), tsjum-zoalm (Oncorhynchus keta), Japansche zoalm (Oncorhynchus masou), koho-zoalm (Oncorhynchus kisutch), en Sakhalien-tajmen (Hucho perryi). Veele walvissn bezoekn de zêekuste, woaroendre de styf bedreigde grysde walvis (Eschrichtius robustus), die allêene mor an de kustn van Sakhalien êm kommt voedn. Andre bedreigde walvissôortn die undre in da gebied ipoedn zyn de grôote oseoannôordkoapr (Eubalaena japonica), de Groenlansche walvis (Balaena mysticetus) en de beloega (Delphinapterus leucas).

Bedreigiengn en beschermienge[bewerkn | brontekst bewerken]

De grotste bedreigienge vo de bioloogiesche verscheidneid is 't uutboatn van de busschn. Bôoriengn vo goaze en oolje zyn bykommnde bedreigiengn.

Eksterne koppliengn[bewerkn | brontekst bewerken]

Zied ook noa[bewerkn | brontekst bewerken]

Boreoale busschn uut 't Palaearctis
PA0601 Boreoale busschn van ôostlik Siebeerje Rusland
PA0602 Boreoale berkebusschn en alpiene toendra in Ysland Ysland
PA0603 Beikn en dinne gezoajde busschn van Kamtsjatka en de Koerieln Rusland
PA0604 Boreoale busschn van Kamtsjatka en de Koerieln Rusland
PA0605 Boreoale busschn van nôordôostlik Siebeerje Rusland
PA0606 Boreoale busschn van Okhotsk-Mantsjoerye Rusland
PA0607 Boreoale busschn van Sakhalien Rusland
PA0608 Skandienoavsche en Russiesche boreoale busschn Finland/Nôorweegn/Rusland/Zweedn
PA0609 Koniefeere-busschn van Transbajkal Mongoolje/Rusland
PA0610 Bergbusschn en toendra van den Oeral Rusland
PA0611 Boreoale busschn van westlik Siebeerje Rusland


Verwyziengn[bewerkn | brontekst bewerken]

<references>

  1. (en) Ecoregion PA0607 : Sakhalin Island taiga (WWF).
  2. (en) Ecoregion PA0607 : Sakhalin Island taiga (Nationalgeographic).
  3. (en) Ecoregion PA0607 : Sakhalin Island taiga (WWF).
  4. (en) Ecoregion PA0607 : Sakhalin Island taiga (Globalspecies).
  5. Kurnaev, S. 1990. Forest regionalization of the USSR (1:16,000,000), Department of Geodesy and Cartography, Moscow.