Drooge busschn van 't binneland van Joekon
De Drooge busschn van ’t binneland van Joekon, zyn 'n ekostreeke uut d' ekozôone Nearctis vôgnst de Weirld Nateur-Stichtienge (WWF). D' ippervlakte van d' ekostreeke besloa 62 400 km² [1][2][3][4]. Ze maakn dêel uut van 't bioom de boreoale busschn of de tajga.
Beschryvienge
[bewerkn | brontekst bewerken]Die ekostreeke die zuudlik Joekon (iengels : Yukon) en e styf klêen dêeltje van nôordwestlik Britsch Koluumbja (iengels : British Columbia), ligt oofzoaklik ip de Joekon-Ôogvlakte, die bestoat uut roende euvels, oogvlaktn en brêed uutgesneen valleejn. 't Gebied êt e droog subarktiesch kliemoat, mê zoomr-temprateurn die gemiddeld roend 11 °C zyn, en wientre-temprateurn mêt e gemiddelde van -16,5 °C toe -19 °C. De neerslag is lêege, mêt e gemiddelde tusschn 225–400 mm, binst da d' oogre geleegn gebiedn en de streekn in 't Nôordôostn mêer neerslag krygn [5].
Plantn-weirld
[bewerkn | brontekst bewerken]Zwarte sparre (Picea mariana) en witte sparre (Picea glauca) zyn de twêe mêest vôornkommnde boomn, mê gewroengn pynboom (Pinus contorta subsp. latifolia) die te vienn is ip styf drooge of verbrande gruujplatsn. Zuudkantn, êlliengn ip klêene oogte zyn dikkers gekenmerkt deur gras-gemêenschappn. Dwergberke (Betula nana), wilge en subalpiene denne (Abies lasiocarpa) zyn te vienn in de subalpiene zôone oendre de boomgrenze, binst da d' alpiene zôone doaboovn e wyduutêenstoande vegetoasje êrbergt die bestoat uut zèèvrekruud (Dryas octopetala) en andre kruudn, dwergstruukn, grassn en korstmossn.
Bêestn-weirld
[bewerkn | brontekst bewerken]
Zoogbêestn van die ekostreeke omvattn karieboe (Rangifer tarandus), eeland (Alces alces), snêewgêete (Oreamnus americanus), dinôornschoap (Ovis dalli), grizzly-beir (Ursos arctos horriblus), Ameriekoansche zwarte beir (Ursus americanus), grysde wolf (Canis lupus), prèèriewolf (Canis latrans), Kanadeesche beevre (Castor canadensis) en oaze. Veuglsôortn omvattn de roave (Corvus corax), alpnsnêew-oene (Lagopus muta) en stêenoarend (Aquila chryaetos).
Bedreigiengn en beschermienge
[bewerkn | brontekst bewerken]Die ekostreeke is goe bewoard, mê e geschatte 75% die nog oengerêpt is. Ôogre liggiengn zyn beetre bewoard of de valeeje-groendn, woa dat de mêeste oentwikklienge in die ekostreeke gebeurd is. Dr zyn gin grôote beschermde gebiedn in die ekostreeke, mo klindre stikkn lik 't Rezervoat Charlie Cole Creek en de Nasjonoale Wildernisse van Nisutlin Rieviere-Delta. Ôostn van oet, mynbow en deur de stoat bevorderde wolvejacht zyn de grotste bedreigiengn vo d' integrieteit van de streeke.
Zied ook noa
[bewerkn | brontekst bewerken]| Boreoale busschn uut 't Nearctis | |
|---|---|
| NA0601 Boreoale bergbusschn van 't Alaska-Schiereiland | Alaska (USA) |
| NA0602 Busschn van 't sentroal Kanadeesch Schild | Kanada |
| NA0603 Boreoale busschn roend de Cook-Golve | Alaska (USA) |
| NA0604 Boreoale busschn van de Koopre-Ôogvlakte | Alaska (USA) |
| NA0605 Boreoale busschn in ôostlik Kanada | Kanada |
| NA0606 Tajga van 't ôostlik Kanadeesch Schild | Kanada |
| NA0607 Vlakte-tajga van Binn-Alaska en Joekon | Kanada/USA |
| NA0608 Busschn van sentroal Kanada | Kanada |
| NA0609 Busschn van 't westlik Kanadeesch Schild | Kanada |
| NA0610 Tajga tusschn de Muskwa-Bergn en 't Grôot Sleevie-Mêer | Kanada |
| NA0611 Busschn van d' ooglandn van Newfoundland | Kanada |
| NA0612 Busschn van 't nôordlik Kanadeesch Schild | Kanada |
| NA0613 Busschn van de nôordlikke Kordieleera | Kanada |
| NA0614 Tajga van de Nôordwestlikke Gebiedn | Kanada |
| NA0615 Woestenyn an de kustn van de schiereilandn Avalon en Burin | Kanada |
| NA0616 Tajga an de zuudlikke Hudson-Boaje | Kanada |
| NA0617 Drooge busschn van 't binneland van Joekon | Kanada |
Eksterne koppliengn
[bewerkn | brontekst bewerken]Verwyziengn
[bewerkn | brontekst bewerken]- ↑ (en) Ecoregion NA017 : Yukon Interior dry forests (WWF).
- ↑ (en) Ecoregion NA017 : Yukon Interior dry forests (Nationalgeografic).
- ↑ (en) Ecoregion NA017 : Yukon Interior dry forests (Global Species).
- ↑ (en) Ecoregion NA017 : Yukon Interior dry forests (Vanderbilt).
- ↑ (en) Ecoregion : Yukon Interior dry forests (WWF).